Хунерли спортчуну хурметин кёрюп

«Бирликдеди кючюбюз» деген ат бла  Акъ-Суу элни «Акъ-Суу» спорт комплексинде армрестлингден  Махийланы Тахирни жашы Ахматны хурметине  ачыкъ турнир  бардырылгъанды. Аны башламчысы Ахматны бир эллиси Нальчикде 33-чю номерли мектепни 11-чи классыны окъуучусу халкъла аралы классда спортну устасы Аппайланы Эмильди. Анга Нальчик шахар округну  жаш тёлю политикасыны управлениясы, элни администрациясы,  КъМР-де Сабийлени эм жаш тёлюню «Биринчилени атламлары» Битеуроссей къырал  жамауат организация да себеплик этгендиле. Эмильни ол ишин дурус кёрюп, кёп эллиле, Ахматны жууукълары, ахлулары, танышлары да турнирге  къараргъа келгендиле. Акъсуучула  къонакълагъа эришиулеге къатышханлагъа да деп, лёкъумла, хычинле, татлы эмда гара суула, башха хантла бла столла къурагъандыла.

Спортну бу тюрлюсюнде къол къарыуларын сынар ючюн деп, Къабарты-Малкъарны эллеринден, шахарларындан, Ставрополь крайдан, Чечен Республикадан  да эллиден аслам  адам келгендиле. Аланы ауурлукълары 65, 75, 90 килограммдан да  атлагъанла эдиле.

Хорламгъа жетер ючюн  эришгенле  къаты кюреш бардыргъандыла. Алагъа судьялыкъны Жылкъыбайланы Ислам этгенди. Хар замандача бу эришиуледе да бек къарыулула хорлагъандыла. Алагъа майдалла, грамотала, саугъала да берилгендиле: Сафарбий  Мариевге, Нёгерланы Альбертге, Уяналаны Ибрагимге   уа,  башда айтылгъан саугъаладан сора да,  кубокла  жетгендиле. Ала эм иги кёрюмдю болдургъандыла.

«Эмильге эмда элни администрациясыны башчысы Гергъокъланы Тимургъа, шахарыбызны жаш тёлю политикасыны управлениясында ишлегенлеге быллай сейирлик эришиулени къурап, ёсюп келген тёлюню саулукълу жашау халгъа юйретиуге салгъан  къыйынлары ючюн жюрек ыразылыгъымы билдиреме. Эмильни бу къурау иши биринчиди, болсада ол аны бла тохтап къалмазлыгъына ийнанама. Турнир а мындан ары тёреге айланыр деп, мурат этеме»,-дегенди КъМР-де  «Биринчилени атламлары» регион бёлюмню советини  башчысы Аслан Шипшев.

Андан сора да,  ол  Ахматны танымагъанын, болсада  спортда жетишимлерини юсюнден а эшите-эшите тургъанын, сёзсюз, аллай жашларыбыз кетселе, аны  жууукъларына угъай да, атын эшитип билген адамлагъа окъуна да уллу ачыу болгъанын чертгенди. «Жарсыугъа, биз аны къайтараллыкъ тюйюлбюз, алай  атын сакъларгъа, эсде тутаргъа эмда ол башлагъан ишни андан ары бардырыргъа уа бизни къолубуздан келликди»,-деп да къошханды  Аслан Шипшев.

                                       х х х

Эсге салайыкъ: акъсуучу  Махийланы Тахирни жашы  Ахмат 2025 жылны август айыны сегизинчи кюнюнде  авариягъа тюшюп ажымлы ёлгенди. Анга жаланда жыйырма бир жыл бола эди. Алай, жаш болгъанына да  къарамай, кесин кёплеге сюйдюргенди, атын игилик бла айтдыргъанды. Аны кёпле таныгъандыла, спорт бла кюрешгени себепли,  татамиде да кёп тенглери бла тюбешгенди. Иги кесек жаш адамгъа спортну сюерге, саулукълу жашау халны бардырыргъа  юйретгенди.

Ахмат сабий заманындан бери да спортну  кёкусинкай тюрлюсю бла къаты кюрешгенди. Ол кёкусинкайгъа  белгили уста, Аппайланы Акъболатны башчылыгъында «Тайфун» клубда  юйреннгенди. Махийланы жаш, магъаналы эришиулеге къатыша, спортда атын кючлю, алгъа баргъан, андан ары да уллу жетишимлеге жетерге боллукъ спортчюча айтдыргъан эди. Онеки жылында  Къабарты-Малкъар Республиканы биринчилигинде хорлагъанды, дагъыда  республикада, Шимал- Кавказ Федерал  эмда Юг Федерал округлада бардырылгъан магъаналы  эришиулеге  республиканы атындан къатышып, хорламла болдура, кёкусинкай  спортда  кёп даражалы майдаллагъа тийишли болгъанды.

Аны не заманда да къаллай ишде да  алгъа итиннген, ариу тилли, кимге да болушлукъ этерге ашыгъып келген жашныча таныгъандыла, ол ахыр такъыйкъалагъа дери тохтаусуз эришгенди.

Ахмат спортда бийик жетишимлеге жетгенине да къарамай, ийменчек, кесин кётюрмеген, менсинмеген жаш эди.