Жамауат жерлени тапландырыугъа – аслам эс

Къабарты-Малкъарда «Жашау этерге инфраструктура» миллет проектни «Иги шахар болум къурау» федерал программасына кёре танг кесек жамауат жер тапландырылады. Ол санда Нальчикде онеки жамауат жер жангыртылгъанды. Аладан уллу эм магъаналы объектледен бирине 2-чи Тамань дивизия атлы орамда Уллу Хорламны 80-жыллыгъына аталгъан паркны айтыргъа боллукъду.

Аны уллулугъу 12 минг квадрат метрден асламды. Ол  тёртге бёлюнеди: Жигитлени, Баш, Ара эмда Къошакъ аллеялагъа. Анга плитка, бордюрла, шинтикле, кир-кипчик атарча орунла эмда чыракълы чыпынла да салып, омакъ этгендиле.   Тийрени айбатландырырча эм жашиллендирирча  да жумуш тамамланнганды.  
Проектни магъанасы - келген тёлюле ата-бабаланы жигитликлерин унутмазча, Ата журтларын сюерча, чынтты патриотла болуп ёсерча этергеди. 

Жамауат жерлени игилендириу жаны бла иш мындан арысында да барады.  Аны бла байламлы бюгюнлюкде нальчикчиле экинчи жыл тапландырылырча   юч объектден бирин сайларыкъдыла. Бу жол конкурсха  115-чи атлы дивизия аталгъан эсгертмени, Киров бла Ватутин  орамла  къошулгъан жерде скверле эм Ватутин атлы орамда жамауат жер кёргюзтюлгенди.   

Эсге сала айтсакъ, тёртюнчю битеуроссей тюзюнлей къол кётюрюуге 12 июньнга дери къатышыргъа жарайды. Аны ючюн,  Къырал жумушланы тамамлагъан бир порталда регистрацияны ётюп, zagorodsreda.gosuslugi.ru сайтда  оюмларын  билдираллыкъдыла.  Бу жумушну кеслери мажаралмагъанлагъа волонтёрла да болушургъа хазырдыла.