Къыралыбызны байрагъы кётюрюллюкдю

Россейни Гимнастикадан федерациясындан билдиргенлерине кёре, Гимнастиканы халкъла аралы федерациясыны толтуруучу комитети россейли атлетлеге салыннган чеклени кетериуню юсюнден оноуну къабыл кёргенди. Энди даражалы эришиуледе къыралыбызны байрагъы кётюрюллюкдю, гимни да эшитдирилликди.

 

Чек гимнастика федерацияда болгъан битеу тюрлюлеринде да кетерилгенди, ала бешдиле: художестволу гимнастика, спорт гимнастика, батутда секириу, спорт акробатика, спорт аэробика. Ызы бла халкъла аралы федерация белоруслу атлетлеге да энди быллай чекле болмагъанларын билдиргенди.

 

Эсигизге салайыкъ, 2022 жылны мартында Украинада бола тургъан ишле бла байламлы россейли эм белоруслу гимнастланы халкъла аралы эришиулеге къатышыргъа эркинликлери сыйырылгъан этген эди. Бир кесек замандан, федерация чеклени жумушакъландыргъандан сора, эки къыралны да спортчуларына байракъсыз эм гимнсиз энчи зачётлагъа сынашыргъа эркинликлерин къайтаргъандыла, алай командалы эришиулеге уа жибермегендиле. Энди бу тюрлю чекле барысы да кетерилгендиле, аны юсюнден оноу федерацияны толтуруучу комитетини 16-17 майда Египетде Шарм-эль-Шейхде этилгенди.   

 

Гимнастикадан федерациягъа дери быллай оноулагъа дзюдодан, тхэквондодан, спортну сууда тюрлюлеринден федерацияла бла Тутушууну бирикдирилген дуниясы къол салгъандыла.