Гитче эмда орта бизнесге 3,2 миллиард сом бла себеплик этилгенди

«Къыйматлы эмда конкуренциягъа чыдамлы экономика» миллет проект бардырылгъан кезиуде Шимал Кавказда гитче эмда орта бизнес андан иги хайыр кёргендиле. Жаланда ахыр эки жылны ичинде МСП Банк алагъа 21,8 миллиард сом багъасына себеплик этгенди, ол санда Къабарты-Малкъардан тийишли биригиуле 3,2 миллиард сом къоллу болгъандыла.

Саулай округда болумгъа къарагъанда, Къабарты-Малкъар бу жаны бла ючюнчюдю. Алчыла Дагъыстан (4,7) бла Чечен республикаладыла (4,3). Бизден сора уа ма была барадыла: Ингушетия (3,1), Къарачай-Черкес (2,9), Ставрополь край (2,5) эм Шимал Осетия- Алания (1,1).

Бизнес алгъан ахчаны асламысы (65 проценти) инфраструктура къурулушлагъа жиберилгенди. Ол бёлюм а кеси ызындан энтта да талай сфераланы тартады.

«СКФО-ну регионлары, аланы ичинде уа эм биринчиден Дагъыстан, Чечен эмда Къабарты-Малкъар инвестицияла жаны бла тириликлерин таукел кючлендиргенлерин кёребиз. Алада этилен тийишли келишимлени арасында 40 проценти учуз кредитлеге таянадыла – ол а рынокда орта кёрюмдюден къайда кёпдю», - дегенди МСП Банкны башчысыны къуллугъун толтургъан Алексей Потапов.

Берилген болушлукъну хайырындан предпринимательле кеслерини инвестиция проектлерин эмда импортну алышыу жаны бла башламчылыкъларын жашауда бардырыргъа онг табадыла. Аны себепли жангы ишчи жерле къураладыла, регионланы экономикалары да кючлене барадыла.