Абаданладан артха къалмай

Бу кюнледе Краснодарда футболдан «Шахарны жай кубогу - 2026» деген сабий-жаш тёлю эришиу ётгенди. Анга Ставрополь крайдан, Ульяновск эм Ростов областьладан, Къабарты-Малкъардан, Краснодарны кесинден да  эм кючлю къауумла къатышхандыла. 

Республикабызны атындан А.Апшевни атын жюрютген спорт школну къаууму ойнагъанды. Эришиуде жаш къауумла тюбешгенликге, оюнла, абаданладача, къызыу халда  ётгендиле:  умутландыргъан футболчула хорламгъа итиниулюклери, чабыуулларында гиртчиликлери, къорууланыуда сакълыкълары бла да аладан аз да артха къалмагъанча эдиле. Ма быллай кюреш республикабызны келечилерин биринчи жерге келтиргенди. Аланы хазырлагъан Андрей Атажукиннге уа «Кубокну эм иги тренери» деген ат берилгенди.