Излемлеге келиширча

Кёп болмай  «Билим бериуню айнытыу» къырал программагъа кёре,  Жанхотияны садигине тынгылы ремонт этип башлагъандыла, деп билдиргендиле Басхан районну администрациясындан.   

Жюз сабийге ишленнген эки къатлы сабий сад  1986 жылда хайырланыргъа берилгенди. Андан бери анга тынгылы ремонт этилмегени ючюн, ол иги да  тозурагъан эди эм жангы излемлеге артыкъ келишмей эди.     

Бюгюнлюкде мекямны башында къанжалларын жангыртып, терезелерин бла эшиклерин салып  бошагъандыла. Энди уа  къурулушчула  ичинде къабыргъаларын акъларгъа хазырлап кюрешедиле эм   башха  жумушланы да тамамлайдыла.  

Проектге кёре, объектни ичин эм тышын да  толусунлай  жангыртырыкъдыла. Ол санда ич эм тыш къабыргъаларын сюртюрюкдюле, полун,  инженер коммуникацияларын эм жылытыучу системасын да алышырыкъдыла. 

Саулай алып айтханда,  мекям жарыкъ, къууатлы  эм жангы излемлеге келиширча  боллукъду. 

Эсге сала айтсакъ,  объект  быйыл жангы окъуу жылгъа хайырланыргъа берилирге керекди.