Къоркъутуп, жунчутуп, ахчасын къымгъандыла

Нальчикни полициячыларына тиширыу хайлачыладан тарыгъып келгенди. Ол билдиргенича, аны телефонуна биреу сёлешип, Роскомнадзорну къуллукъчусума деп,   Госуслуги порталда болгъан шартлары аманлыкъчыланы къолларына тюшгенлерин айтханды. Ызы бла банкда ахчасын къыралда ишине чекле салыннган организациягъа ётдюрюрге кюрешедиле деп алдагъанды. 

Аманлыкъчыла, аны бла тохтап къалмай, тиширыугъа бир ненча кюнню сёлешип тургъандыла. Аладан бирлери полициячыма, башхасы къырал органлада ишлейме деп, тиширыугъа къысыулукъ этгендиле. Террористлеге ахча ашыргъанса деп, къоркъутуп, онгун алгъандыла. Жунчугъан  тиширыу ахчасыны бир кесегин анга билдирилген банк счётха ийгенди, къалгъанын а курьерге бергенди. 

Алай бла аманлыкъчыла тиширыудан 12,6 миллион сомну къымгъандыла. 

«Нальчик» УМВД-ны полициячылары РФ-ни УК-сыны 159-чу статьясыны 4-чю кесегине бузукълукъ этилгени бла байламлы уголовный иш ачхандыла. 

Хурметли окъуучула! Право низамны сакълаучула къоркъуусузлукъну жорукъларын къайтарып эсгертедиле. Биринчиден, «Къоркъуусуз счёт» болмагъанын билирге керекди. Россейни банкыны, Росфинмониторингни, Роскомнадзорну къуллукъчулары инсанлагъа телефон бла бир заманда да сёлешмейдиле неда жазмайдыла. 

Право низамны сакълаучу органланы келечилери  ахчангы урлай турадыла, сакъларгъа керекди деп, адамгъа бир заманда да билдирмейдиле неда ахчаны банкдан алып, манга ашыр, аны сакъларгъа болушурукъма демейдиле.  Госуслуги порталны неда Цифралы айнытыу министерствону келечилери инсанны телефонуна сёлешип, андан бир тюрлю тарихлени сурамайдыла.  

- Бу артыкъ къыйын болмагъан жорукъланы эсде тутугъуз, мюлкюгюзге сакъ болугъуз,-дегендиле бизге КъМР-де МВД-ны пресс-службасындан.