Эм бийикде орналгъан къонакъ юй

Бу кюнледе Элбрус тау-лыжа курортда «Къарабаши» станцияны къатында 3912 метр бийикликде чыккырлагъа неда самолётлагъа ушагъан къонакъ юйлени «Cosmos Эльбрус Липрус Лагерь» комплекси ачылгъанды. Ол бюгюнлюкде, Россейден тышында, Европада окъуна эм бийикде орналгъан эко-отельге саналады. 

Сагъынылгъан объектни Кавказ.РФ. институт бла келишгенлеринден сора «Cosmos» къонакъ юйлени тутхан «Cosmos Hotel Group» биригиу алгъанды. Алай бла бу объект биригиуню сетьлеринде 47-чи болгъанды. 

Къонакъ юй апрельден сентябрьге дери ишлерикди. Мында профессионал халда альпинизм бла кюрешгенле эм таулагъа ёрлерге сюйгенле да хауагъа юйренирге эмда солургъа онг табарыкъдыла.  

– Туризм жаны бла къыйматлы регионда къонакъ юйню алгъаныбыз ишибизни айнытыуда магъаналы атламды. Мындан арысында ол «Cosmos» ат бла ишлерикди, аны стандартларына келиширикди эм биригиуню бир системасына къошуллукъду. Саулай алып айтханда, туризм бёлюмню къонакъ юйле бла жалчытыуда ахшы къошумчулукъ этер деп ышанабыз,- дегенди «Cosmos Hotel Group» биригиуню таматасы Александр Биба.

«Cosmos Эльбрус Липрус Лагерь» комплексде 34 адамгъа жатар жер барды. Аны бла бирге модульланы жылытырча, жылы суу бла къол-бет жууарча, жууунурча, кийимлени эм башха затланы да энчи бир отоугъа жыярча да онгла къуралгъандыла. 

Мында кафе, ашхана бардыла, Интернет ишлейди. Юйчюклени терезелеринден къаялагъа ариу сыфат ачылады. Таза хауада олтурургъа сюйгенлеге да арбазларында омакъ шинтикле жарашдырылгъандыла. Кече отельни ичинден эм тышында да тёгерек-башны жарытырча чыракъла жанадыла.