Басхан ГЭС-де эсде тутууну белгиси

Уллу Хорламны кюнюн белгилеуню чеклеринде «РусГидро» компанияны Къабарты-Малкъарда бёлюмюню келечилери Басхан ГЭС-ни тийресинде эсде тутуу Аллея ачхандыла. Экология эмда патриотлукъ жаны бла магъаналы жумуш болуп, ол  Уллу Ата журт урушну жигитлерине жораланнганды, кеси да хорлам болдургъанлагъа ыразылыкъны белгиси болгъанды. Бу ишге бёлюмню ишчилери, жаш специалистле эмда энергетиканы ветеранлары къатышып, аллеяда жаш терекчикле бла гюлле орнатхандыла.

Уллу Ата журт урушну тарыхында Басхан ГЭС энчи жерни алады. Ол кезиуде станцияны магъанасы саулай регионнга окъуна бек уллу болгъанды. 1942 жылда Кавказ ючюн сермешле баргъанда, бу гидроэлектростанциягъа да хата салынмай къалмагъанды. Кетип баргъан немисли аскерчиле аны кёп жерлерин чачхандыла. Бу тийрелени душмандан тазалагъандан сора уа, энергетикле мычымай аны жангыртып башлагъандыла. Урушдан сора Басхан ГЭС регионну электрокюч бла жалчытып тебирегенди.

Бюгюнлюкде бу станция Шимал Кавказда энергетика предприятияланы арасында эм эрттегилиге саналады. Анда уруннганлагъа да тарыхны, ата-бабалары этген жигитликни эсде тутуу бош сёзле тюйюлдюле. Бу аллея кеси да тёлюден-тёлюге кёче баргъан ыразылыкъ белгиледен бири боллукъду.