Борчун тёлерге ашыкъмагъанды

Кёп болмай «Россети Северный Кавказ»-«Каббалкэнерго» биригиу иги кесек заманны тёлемей  борч этген «Экологистика» компаниядан дау бла ахчасын алырча мадар излерге тюшгенди. Аны кезиуюнде   Къабарты-Малкъарны  арбитраж сюдю 8 искге къарап оноу чыгъаргъандан  сора,  сагъынылгъан компания 2 миллионнга жууукъ сом бергенди.

Эсге сала айтсакъ, бюгюнлюкде  «Экологостика» ток бла жалчытхан  «Каббалкэнерго»  биригиуню уллу борчлары  болгъанланы тизмесине киреди.  Ол ишлеп башлагъанлы алай кёп болмаса да озгъан айны аллында 2,8 миллион сом берлиги бар эди.
Бюгюнлюкде ахчаны къалгъанын да тёлетирча  иш бардырылады, ол санда сюдлеге 675 минг сом багъасына юч иск берилгенди.

Эки ай чакълы тёлемеген инсанны биригиу ток ыздан кесерча эркинлик бериледи. Андан сора да, кёп заманны тёлемей, борч этип тургъанла игилик бла ангыламасала, аланы закон бла жууапха  тартырча онг барды. Аллай амаллагъа ишлерин сюдге бериу, токну хайырланалмазча чек салыу киреди. Уллу кёллюлюк этгеннге,  борчундан тышында, тазир тёлерге да тюшерикди. Аны себепли токну къаллай бир ойнагъанын айны 23-26 кюнлеринден кеч къалмай жиберирге эм тёлеулени уа онусуна дери этерге тийишлиди.

«Россети Северный Кавказ» биригиуден  билдиргенлерича, ток ючюн заманында этилген тёлеулени хайыры бла республиканы электрокюч бёлюмю ишин тынгылы бардырады, ол санда ток бла сылтаусуз жалчытырча эм аны качествосун ёсдюрюрча мадар этиледи.