Чаришлеге къараргъа уллу, гитче да келгендиле

Кёп болмай Уллу Хорламны 81-жыллыгъына  атап  Нальчик шахарны ипподромунда  чаришле  болгъандыла, деп билдиргендиле КъМР-ни  Эл мюлк министерствосундан.   

Бу жол атланы жыл санларына кёре он эришиу болгъанды, саугъалагъа берилирча уа 1,7 миллион сом бёлюннгенди.   Алагъа къумалы ингилиз эм арап атла да къатышхандыла.  Болсада баш саугъаладан бири  -  Уллу Хорламгъа аталгъанды.  Аны кезиуюнде  ючжыллыкъ атла 1600 - метрлик жолну  къыдырыргъа керек болгъандыла. Аны саугъа фондуну ёлчеми 500 минг сомгъа жетгенди.

Бу жол  бирсиледен иги да алгъа чыгъып  баш саугъагъа Дагъыстанны Ногъай районундан  «Кунбатар» клубну  "DombraSong" ажири  тийишли болгъанды. Аны юсюнде уллу сынамы болгъан эмда белгили жокей   Каппушланы Мырзабек  жортханды.   

Аны бла бирге Байсолтанланы Алимге,   Михаил Яхогоевге  эм Арсений Головкогъа аталгъан даражалы  чаришлеге да айтхылыкъ клубланы келечилери къатышхандыла.

Ол кюн  къараучуланы концерт программа да сакълагъанды. Аны кезиуюнде  Къабарты-Малкъарны артистлери,  уруш заманланы жырларын айтып,  къонакъланы кёллерин алгъандыла.  Ашаргъа -ичерге сюйгенле  фудкорт ишлегенди эм  сабийле ойнарча майданла да къуралгъандыла. 

Эсге  сала айтсакъ, хар замандача, чаришлеге хакъсыз къараргъа жарагъанды.