Чыгъармачылыкъ ишле бла кюрешгенлени да онгдурады къырал

Къолдан усталыкъла, аш этип сатыу, компьютер оюнла жарашдырыу неда сурат этиу не заманда да хунерлери болгъан адамланы зауукълукъ эмда аз-маз айда берген ишлерине саналыучу эдиле. Энди уа ала Россейде экономиканы жангы бёлюмюне – креатив индустриягъа - саналып башлагъандыла. Ол а, тергеулеге кёре, сатыу-алыудан эмда производстводан тёрт кереге терк ёсе барады. Ахыр беш жылны ичинде 56 процент къошуп, буруннгу жыл къыралны ВВП-сында аны юлюшю 4,1 процент (7,5 триллион сом) болгъан эсе, былтыр 0,1 процент къошуп, 8,3 триллион сомгъа жетгенди. «Кеси да эл мюлк, туризм эмда къурулуш бла тенг болады», - дегенди РФ-ни Правительствосуну Председателини орунбасары Александр Новак кёп болмай бардырылгъан Кавказ инвестиция форумда.

Бу бёлюмде бюгюнлюкде 451 минг гитче эмда орта предприниматель ишлейдиле, аладан кёп къалмай 40 проценти жаш адамладыла.

Хунерлери болгъан адамлагъа предприниматель болургъа право жаны бла чырмаула, анга кёре уа креатив предпринимательге ким саналады эмда себеплик кимге этилирге керекди деген даулашла былтыр тийишли закон чыкъгъаны бла кетерилгендиле. Ол «креатив продукт» эмда «индустрияны субъекти» деген ангылауланы кийиргенди. Ызы бла РФ-ни Экономиканы айнытыу министерствосу тийишли ишлени эмда жумушланы тизмесин жарашдыргъанды, Къабарты-Малкъарда да ол къурала турады.

Алай бизни республикада бу бёлюмню къайгъысын ары дери окъуна этип башлагъандыла: креатив экономиканы айнытыу борч регионну Экономиканы айнытыу министерствосуна 2022 жылда салыннганды. Ызы бла эс неге буруллугъун туура этген закон да чыкъгъанды: къолдан усталыкълагъа, миллет энчиликлери болгъан дизайннга, жер-жерли аш этиуге эмда тийишли жумушлагъа себеплик эм биринчиден ма алада башламчылыкълагъа этилликди.

Анга кёре бизнесигиз архитектура, дизайн, мода, реклама, IT-жарашдырыу, кино, макъам, миллет усталыкъла, телерадио бериуле чыгъарыу, маданият жаны бла билим бериу, энчи аш-азыкъла этиу бла окъуна байламлы эселе  сиз къыралны кёз туурасына тюшериксиз.

Себеплик дегенде, бу жаны бла бюгюнлюкде окъуна кёп амал барды: РФ-ни Президентини эмда Правительствосуну премияларындан башлап, федерал министерствола эмда къырал структурала (Россейни экспорт арасы, Росмолодёжь, Стратегия башламчылыкъланы агентствосу, «Креатив экономика» эмда «ИРИ» АНО-ла) берген амаллагъа дери.

Улбашланы Мурат.