Эл унутулмазлыкъ жигитлерине сый бергенди

Черек районну Бабугент элинде Глашланы Фаризат башчылыкъ этген орта школ жамауатны бирикдирген, халкъыбызны къууанчларын белгилеген, аны  бла бирге  жарсыуларыбызгъа эс бургъан  жерди. Хорламны сыйлы кюнюню аллында  Бабугентни школунда эки мемориал къанга ачылгъанды – СВО-да  Россей ючюн жанларын берген Бёзюланы Альбертге бла Мамуколаны Султаннга. Экиси да Россейни Президенти Владимир Путинни буйругъу бла «Кишиликни ордени» бла саугъаланнгандыла.

Бек кёп адам келген эди жашлагъа баш урургъа, жууукъларына энтта да тюберге, ёлгенлени  хурметлерге. Мудах  эдиле битеу жыйылгъанла. Къаллай ауур сагъышла баса эдиле жюреклерибизни. Къалай эрий эдик жигитлени сабийлерине. Фронтчу Къулийланы Къайсын билип, сынап жазгъанды узакъда атылгъан окъла аналаны жюреклерине жетгенлерини юсюнден. Ненча жаралы адамла бардыла арабызда жюреклеринден къан тамгъан. Бабугентде жыйылгъанла къайтарып айтхандыла: къыйынлыгъыгъызны кёребиз, сезебиз, жан аурутабыз. 

Бёзюланы Анатолийни жашы Альберт бла Мамуколаны Алимжанны жашы Султан Бабугентни школун бошагъандыла.

Альберт 1984 жылда майда туугъан эди. 2024 жылдан бери аскерде ефрейтор болуп контракт халда къуллукъ эте эди. Альберт ЮФО-ну ючюнчю аскеринде 85-чи  мотострелковый бригадасында гранатомётчик болгъанды. 2024 жылда  октябрьде  бир къауум жаш Раздоловка элде  алагъа салыннган ишни толтургъан кезиуде дронла  эм миномёт  от тюбюне тюшгендиле. Альбертни тенги жаралы болгъанды. Таулу жаш аны атмагъанды, жёнгерине биринчи медицина болушлукъ этгенди. Жарсыугъа, алайда кеси да жаралы болуп  ёлгенди. Альберт бла бирге къуллукъ этгенле аны адамлыгъын, халаллыгъын, аны бла бирге къатылыгъын, жигитлигин чертедиле.

Мамуколаны Султан а 1988 жылда июньда туугъан эди. Университетде ПГС-ни бошагъанды, къурулушчу болургъа керек эди. Алай 2010 жылда Нальчикде жыйырманчы  номерли энчи бёлюмде кинолог болуп ишлеп башлайды. 2022 жылда мобилизациягъа тюшеди. Запорожский ызда 136-чы  мотострелковый бригаданы взводуну командири эди. 2025 жылда апрельде  Султанны бек къыйын жерге жибередиле: Белгород областьда штурмовой отрядны командири болуп, Харьковское   ызда уруш этгенди. Султан кишиликни юлгюсюн кёргюзтген адам эди. Къоркъгъанланы кёллендирген, къатындагъылагъа  билеклик этген. 

Мамуколаны Султанны бла  Бёзюланы Альбертни жашлары назмула окъугъанда, ташла да жилягъан болур эдиле.

Бабугент элни администрациясыны башчысы Мокъаланы Кемран: «Жер башында битеу халкъла да мамыр жашасынла, къазауатла теркирек бошалып», - дегенди. Кертиси бла да, ёксюз сабийле болмагъан, анала жилямагъан, топла атылмагъан дуния келсе, къалай иги боллукъду.

Черек районда урунууну эм урушну ветеранларыны советини башчысы Чеченланы Георгий: «Бусагъатда СВО-да къазауат баргъан жерледе  Черек райондан 240 адам уруш этедиле. Ала бизни къыралыбызны сейирлерин къоруулайдыла. Аланы аппалары уа битеу Европаны фашистледен тазалагъан эдиле», - дегенди.

Башха сёлешгенле да Ата журтларына къуллукъ этгенлеге хурметлерин билдиргендиле.

Школну директору Глашланы Фаризат: «Ийнаныгъыз, бу ишни  къыйналып къурагъанбыз. Мен жигит жашларыбызны устазыма. Урушхан да этиучем, махтагъан да этгенме. Бюгюн а биз алагъа мемориал ачабыз… Окъуучуларыбызгъа назмула айтхан да, урушха аталгъан жырланы жырларгъа да бюгюн къыйын эди бизге. Жаннетли болсунла жигитлерибиз. Аланы сабийлерине, жууукъларына тёзюм тилейбиз. Биз Бёзюланы Альбертни бла Мамуколаны Султанны бир заманда да унутурукъ тюйюлбюз», - дегенди.