Агъач, уучулукъ эмда талай башха мюлкледе уруннганланы онгдурургъа

Къабарты-Малкъарны Правительствосуну кезиулю жыйылыуу видеоконференция халда бардырылгъанды. Анда инсанлагъа социал болушлукъ бериу, жашау журт политика, гитче эмда орта предпринимательствону айнытыу жаны бла тогъуз бегимни эмда буйрукъну проектлерин сюзгендиле эмда тийишли оноула этгендиле.

Жер участкаланы хакъсыз хайырланыугъа кимле алыргъа боллукъларыны юсюнден жер эмда ырысхы бла байламлы халланы министри Аслан Тохов айтханды. Сёз мында агъач, жол эмда уучулукъ мюлкледе, транспортда, сора «Приэльбрусье» миллет паркда уруннганланы онгдурууну юсюнден барады. Участка ала ишлеген жерлерини къатында жашасала берилирге боллукъду, кеси да анда уруннган кезиуге. Жерде бахча салыргъа жарарыкъды неда аны энчи мюлк жумушлагъа хайырланыргъа боллукъду.

Республиканы къурулуш эмда ЖКХ министрини къуллугъун толтургъан Андрей Журавлёв «КъМР-де жашагъанланы жашау журтла эмда коммунал жумушла бла жалчытыу» къырал программаны паспортуна кийириллик тюрлениулени туура этгенди. Ол билдиргенича, ала шёндюгю излемлеге эмда бюджетни онгларына таянып, умутланы алай толтурургъа, сора ахча бла жалчытыргъа буруладыла.

Регионда къырал микрофинанс организацияла берген онгланы учуз багъасы бла гитче эмда орта предпринимательство субъектле хайырланыр ючюн, ахчаны къайсы проектлеге къоратыргъа боллугъуну юсюнден экономиканы айнытыу министр Рахайланы Борис билдиргенди. Бу башламчылыкъны себебинден регионнга эм магъаналы бёлюмледе бизнесге билеклик этиуню кенгертирге боллукъду.

Кенгешде  дагъыда  КъМР-де социал жумушла бла жалчытхан организацияда уруннганланы саны, анда юйюр-кёп функциялы ара къуралгъаны ючюн тийишдирилгенди. Дагъыда регионну Правительствосуну талай алгъыннгы бегимине эмда актына тюрлениуле кийирилгендиле.