«Тёлюден тёлюге ёте келген къарындашлыкъ байламлыкъланы сакълар ючюн бирикгенбиз»

Россей-Абхаз жаш тёлю форум бошалгъанды. Ол Нальчикде юч кюн баргъанды. Анга эки къыралны да жаш тёлюсюню келечилеринден 300 адам къатышхандыла. Ала билим бериуде, маданиятда, саулукъ сакълауда, туризм ишледе жыйгъан сынауларыны юсюнден хапарлашхандыла, студентле, предпринимательле бла тюбешип, кёп жангы затланы эшитгендиле. Андан сора да къазауатлагъа къатышхан ветеранла бла да тюбешиуле къуралгъандыла.

Бу уллу жыйылыуну экинчи кюнюнде форумну келечилери Къабарты-Малкъарны айбатлы жерлеринде болгъандыла. Алагъа Черек, Элбрус, Чегем, Зольск эм Урван районлада ариу жерлерибизни кёргюзтюр ючюн, администрацияла да болушхандыла.

Форумну ахыр кюнюнде ала къауум-къауум болуп, республиканы министерстволарында къонакъда болгъандыла.

Республиканы курортланы эм туризмни министерствосун сайлагъанла «Больше, чем путешествие» проектни бизден Абхазиягъа элтген турист маршрутуну юсюнден билгендиле. Бешкюнлюк тургъа «Апсны – страна души» ат берилгенди. «Больше, чем путешествие» проектни маршрутлары туризм бла бирге билим бериу магъанада къураладыла.

Алай бла, министерствода кёргюзтюлген маршрут Жаш тёлюню битеудуния фестивалындан сора 20 къыралны келечилери хайырланаллыкъдыла. Аны сюзюуге къатышханла Абхазияны маданиятын, тарыхын толуракъ кёргюзтюрча, маршрутха бир къауум тюрлениуле кийирирге керекди деген оюмну айтхандыла.

«Абхазияда сейирлик маршрутну кёргенибиз бла бирге кесибизни шахарыбызда къаллай маршрут къураргъа боллукъду, деген сагъышла башыбызгъа келгендиле», - дегендиле Санкт-Петербургдан келгенле.

Министерстводан сора бу къауум «Шагди» деген ат спортну комплексинде баргъандыла. Анда алагъа къабарты къумалы атланы юслеринден хапар айтхандыла. Андан сора да, республикада жашагъан миллетлени сауут-сабаланы, атлыла бардыргъан урушланы энчиликлерини юслеринден ала кёп жангы затла эшитгендиле.

Бираз жауунчукъ жауса да, къонакъла комплексни тийресинде атлагъа минип айланыргъа онг тапхандыла, аланы жылы локъумла, бишлакъ эм плов бла сыйлагъандыла.

Форумну ахыр кюнюнде анга къатышханла Басманы юйюнде да болгъандыла. «Адыгэ псалъэ» газетни баш редактору Заурбек Жилясов республикалы редакцияланы ишлерини юслеринден хапар айтханды. Ол аланы эслерин «Басма информация органла тамблагъы кюнде керек боллукъмудула?» деген соруугъа бургъанды. Редакцияны къонакълары кеслерини оюмларын билдиргендиле, сынаулу журналистлени насийхатларына тынгылагъандыла.

Кюнню экинчи жарымында форумгъа келгенлени къаууму Донецк Халкъ Республиканы жигити, «Пятнашка» кёп миллетли бригаданы командири Арха Авидзба бла тюбешгендиле. Аны магъанасыны юсюнден кесини оюмун жаш тёлюню ишлерини министрини экинчиси Ахметланы Артур айтханды. Жаш тёлюню патриотлукъ ниетледе юйретиуню юсюнден кесини оюмларын КъМР-ни Правительствосуну экинчиси Залим Кашироков бла Абхазияны вице-премьери, къырал комитетни председатели Тарас Хагба билдиргендиле.

«Биз кесибизни къарындашларыбыз бла тёлюден тёлюге ёте келген культурабызны бла тёрелерибизни сакълар ючюн бирикгенбиз», - дегенди Залим Кашироков.

Тарас Хагба бюгюнлюкде эки къыралны жаш тёлюсюню араларында тохтамай байламлыкъла болургъа кереклисин белгилегенди.

«Бизге болушлукъ керек болгъанда, сизни къыралыгъыз экинчи кюн бизге билеклик этгенди, бизни баш эркинлигибиз ючюн урушханды. Биз аны бир заманда да унутурукъ тюйюлбюз! Къарындаш къыралгъа, къарындаш республикагъа болушургъа кюреширикбиз!», - дегенди ол.

Ючюнчю кюнню ингиринде форумну къууанчлы халда жабылыуу болгъанды. Анда эки къыралны маданиятыны усталары концерт бергендиле. Ахырында, 300 адам «Эльбрус» банкет залда жыйылгъандыла. Кюз артында ала Абхазияда форумну экинчи урумуна жыйыллыкъдыла.