Орамда къоркъуусузлукъну жалчытырча

Къабарты-Малкъарны ара шахарында жоллада къоркъуусузлукъну жалчытыу бла байламлы тохтамай ишле бардырыладыла, орамлада транспорт инфраструктура игилендириледи эм тийишли мардалагъа келтириледи, деп айтылады КъМР-ни Башчысыны Администрациясыны MAX-да каналында.

Энчи службаны келечилери сау кюнню ичинде светофорла тохтаусуз ишлеп турурча мадарла этедиле, ала бузулсала уа, мычымай ремонтун бардырадыла. Жоллада къоркъуусузлукъну андан ары жалчытыу бла байламлы къошакъ халда Т7 маркалы светофорла салынырыкъдыла. Аллай светофорланы башхаладан энчиликлери неди десегиз, аны жанып, ёчюлюп тургъан белгиси автомашинаны жюрютгенлеге алгъадан окъуна пешеходла ётген жер жууукълашханын эслерге онг береди, аны бла уа транспортну бир кесек акъыртын сюрюрге кереклисин ангылатады.

Башда сагъынылгъан жумушла Нальчикде орамланы эм жолланы тап халгъа келтириу программаны чеклеринде бардырыладыла. Битеу да 2019 жылдан бери ара шахарда 778 жангы светофор орнатылгъанды, ол санда Т7 маркасы болгъанла.

Транспорт жюрюген жерлеге тохтаусуз жангы техника амалланы сингдириу жоллада аварияланы азайтыргъа онг береди, аны бла бирге автомашиналаны жюрютгенлеге бла пешеходлагъа да шахар болумлада къоркъуусуз айланыргъа онг чыгъады, деп айтылады билдириуде.