Таза суу бла сылтаусуз болурча

Къабарты-Малкъарда «Жашау этерча инфраструктура» миллет проектге кирген «Коммунал инфраструктураны жангыртыу» федерал программагъа кёре  2025-2027 жыллада ичер суу бла жалчытырыкъ 36 объект ишленирикди неда жангыртыллыкъды. Аладан 14-сю муниципалитетлеге жетеди. Саулай алып айтханда, юч жылны ичинде сагъынылгъан федерал проектни чеклеринде республикада 200 километрде суу  быргъыла тартыллыкъдыла эм суу жыйылгъан юч жер ишленирикди, деп билдириледи КъМР-ни Къурулуш эмда жашау журт-коммунал мюлк министерствосуну пресс-службасындан.

Бу кюнледе тийишли ишле Хабазда да барадыла. Аны кезиуюнде суу жыйылгъан темир чыккырла (водозаборла) ишленнгендиле, жангыдан быргъыла тартыладыла, вентильле турлукъ жерлеге къуюла жарашдырыладыла, гидрантла салынадыла эм башха жумушла тамамланадыла. 

Сагъынылгъан  амалны хайыры бла шаудан эм башха суучукъла да зырафына кетмей бир жерге жыйылырча мадар этилликди. Суу арбазлагъа берилирден алгъа топуракъдан, мелден эм башха затладан да тазаланырыкъды. Объектни узунлугъу 7,4 километрге жетеди. Энди аны хайыры бла 1700 чакълы арбаз ичер суу бла сылтаусуз боллукъдула. Бюгюнлюкде ишлени 70 проценти тамамланнганды.

Саулай алып айтханда, сагъынылгъан ишлеге 24 миллион сом къоратыллыкъды. Анга ахча сагъынылгъан къырал программагъа кёре бёлюннгенди.

Планнга кёре объект быйыл август айда хайырланыргъа берилирге керекди. Болсада специалистле аны болжалдан алгъа бошаргъа хазырдыла.