Танымагъанны сёзюне ийнанып

Россейни МВД-сыны Зольск районда бёлюмюне 47-жыллыкъ эр киши тарыгъып келгенди. Ол билдиргенича, бир ненча кюн алгъа анга  танымагъан биреу сёлешип, Роскомнадзорну къуллукъчусу болгъанын, аманлыкъчыла аны банкда счётунда болгъанын  урларгъа умут этгенлерин айтханды. Аны сакълар ючюн а,  ахчаны «къоркъуусуз счётха» иерге кереклисине женгдиргенди. Танымагъанны сёзлерине ийнанып, эр киши белгили этилген счётха 3,6 миллион сомну ийгенди.

 Хыйлачыланы «ыргъакъларына» энтта 40-жыллыкъ нальчикчи тюшгенди. Ол Интернетде станок сатылгъаныны юсюнден билдириуню тапханды, аны сатып алыргъа миллион сомдан артыкъ  ийгенди. Ахча тюшгенлей, билдириуню басмадан кетерип, аны иеси тас болуп къалгъанды.

Бу шартла бла байламлы уголовный ишле ачылгъандыла.

Полициячыла жамауатны сакъ болургъа чакъырадыла. «Къырал учрежденияланы къуллукъчулары   мессенджерде жазмайдыла инсанлагъа, ахчаны башха жерге ашырыгъыз деп да къысарыкъ тюйюлдюле. Дагъыда Интернетде сатыу-алыу этгенде да сакъ болугъуз. Ахчаны товарны алырдан алгъа ашырсагъыз, къуру  къаллыгъыгъызгъа къоркъуу уллуду»,-дегендиле бизге Ич ишле министерствону пресс-службасындан.