«Ара шахарда жашаргъа онгум болса да, жюрегим туугъан жериме тартханды»

Тёгерегинде адамла бла жарашыулу, алагъа жарыкъ болуу, тутхан ишинде айный билиу жетишимли инсанны ышанларындан биридиле десек, жангылмазбыз. Аллай жаш адамларыбыздан бири Ахматланы Борисни бла Алботланы Ханифаны къызлары Заирады. Ол ишлеген жерлеринде адамла бла бир тил таба билгенди, сынам жыйгъанды, бюгюнлюкде уа кесини производствосун да ачып, хайырланыучуладан ыразылыкъ тапханды. Ол ишини энчиликлерини, къаллай жетишимле болдургъаныны юсюнден а бизге ушагъыбызда билдиргенди.

 Зауира кёп сабийли юйюрде ёсгенди, юч эгечи бардыла. Сабийлиги Жанхотия элде ётгенди, абаданыракъ болгъанында уа юйюрю бла Тырныауузгъа кёчгендиле. Анда 1-чи номерли лицейни тауусханды, битеу бешле болмагъан эселе да, аман а окъумагъанды. Бийик билим алыргъа заман жетгенде, атасы бла анасы  тилни иги билгени себепли Филология факультетге киририн сакълай эдиле. Алай къызлары Инженер - техника факультетни «Управление качеством» деген бёлюмюн сайлагъанды. Экзаменлени ахшы берип, анда окъуп башлагъаны бла атасы бла анасы да бек сейирсиннген эдиле. 

- Малкъар тилден олимпиадада алчы жерни алгъаны себепли, ары экзаменсиз кирирге окъуна онгум бар эди, - деп эсгереди Заира. - Алай ИТФ-ни сайлагъаныма бир да сокъуранмагъанма, аны къызыл дипломгъа бошагъанма, сора магистратурагъа киргенме. Окъуу жылларым къыйын болгъан эселе да, бек сейир эдиле, кёп затха юйреннгенме, артда жашауумда анда алгъан билимим да жарагъанды. Неден да бек аудитни жаратханма. Устазыбыз Римма Волкова манга юлгю эди, андача къаты, билимли боллугъум да келе эди. Бир уллу компанияда тинтиуле бардырыргъа мурат да этген эдим.

Магистратурада окъугъан кезиуюнде бош заманы аслам болуп, ишге кирирге онг чыгъады, аны хайырланып,  почтада урунуп башлайды. Алай анда жангыз жети айны тургъанды – ол заманны ичинде документле бла ишлерге, адамла бла байламлыкъла тутаргъа юйреннгенди, ол да аламат сынам эди. Алай бу иш манга келишмегенин ангылап, анда кёпге къалмагъанды. Магистр дипломну алгъанындан сора, бир кесек солур муратда эгечи бла Москвагъа, Санкт-Петербургга баргъандыла, андан къайтханлай а жангы иш излеп тебирегенди. Газетде билдириуледе Высоковольтный аппаратураны хазырлагъан заводда качество жаны бла инженер изленнгенин кёрюп, ары барыргъа таукелленнгенди. «Анда сёлешиулени ётгенме, ала тынч болмагъанларын да белгилерге сюеме. Алгъа билимиме заводну генеральный директору Махийланы Руслан (жаннетли болсун) къарайды. Ызы бла уа заводну директору Махийланы Абдулла бла сёлешеме. Ол кёп соруула бергенди, ахырында мени кандидатурамы къабыл кёреди эм, башха адамладан болушлукъ сакъламай, кесим ишлерге керек болгъанымы чертгенди. Бу сёзлери бир кесек сагъайтсала да, къоркъутмагъандыла. Коллективибиз бек иги эди. Бу заводха тюшгениме бек ыразыма – анда усталыгъымы ёсдюргенме, сынам жыйгъанма, тенгле да тапханма. Анда эки жылны уруннганма, бусагъатда къарындашым бла ишлейме эм кесими продукциямы чыгъарама», - дейди ушакъ нёгерибиз.

Ара шахарда къалыргъа да бар эди онг, алада жууукъларым жашагъандыла, кеслерине чакъыргъанлай тургъандыла, иш да табылгъан эди. Алай ол мында атасы бла анасы, тенглери, туугъан жеринден узакъ болургъа сюймегенди.

Заира шампуньла бла эм чачха керекли башха затла чыгъарады. Аны юсюнден айта, бу иши аны бек къууандыргъанын белгилейди: «Мен шампуньла, чач тюшмезча спрейле, маскала жарашдырама. Эртте кесиме, эгечлериме маскала этип кёрген эдим, болушханын эслейме, алай ол заманда производство ачаргъа акъылым жокъ эди. Инстаграммгъа къарай кетгенде, адамла этген затланы сатханларын кёрюнюп, кесим да башларгъа умут этеме. Специалистле – трихологла, химикле, биологла эм башхала специалистле бла тюбейме, сора ала бла бирге ишлеп тебирейбиз. Бек биринчи чач тюшюуден сакълагъан, чачны жангыдан ёсдюрген «ZAIRAZARA» спрей чыгъаргъан эдим, анга кирген битеу ингредиентлени атларын айталлыкъ тюйюлме, ол коммерциялы жашырынлыкъды дейик. Аны букъдуруп этмейме, алай бирле эшитгенлей, меникине ушагъан жалгъан продукция этип тебирерикдиле, аллайланы качестволары уа иги болмаучуду. Аны адамла сынап кёредиле, эм болушханын билдиредиле. Аны алгъан къызла, ыразылыкъларын билдире, чачлары къалын болгъанын, аз тюшгенин дайым жазадыла. Ол да кёлюмю кётюреди. Ызы бла шампунь бла маскала чыгъарып  башлайбыз, бусагъатда пилинг да хазырлап тебирегенбиз. Кёп болмай а, Эмиратладан уллу партия алыргъа заказ келгенди».

Тынгылы зат учуз болмайды, дейди Заира. Ол ангылатханыча, аны сылтауу ингредиентле кеслери багъа тургъанларындады, аланы барысын да качестволарын тинтип алады. Сора, алыучуларыны алларында жууаплылыгъын, адамланы ышаныуларын алдатыргъа жарамагъанын да сезеди. Аны бла бирге тинтиулерин бардыргъанлай, ма бир зат да жетишдим, ол болады деп, жерингде туруп къалыргъа жарамагъанын черте, жангычылыкъланы излегенлей турады.

- Жарашдыргъан затларым адамлагъа жарагъанлары мени бек къууандырады, - деп къошады Заира. - Былайда бир затны эсгертирге сюе эдим: адамны чачлары тюшмей эселе, ол жарсымайды. Алай профилактика этерге керекди, экологиябыз, аш-азыгъыбыз сейирлик иги тюйюлдю. Ол жарсыу кимге да келирге боллукъду.  Жашауубуз тынч тюйюлдю, тиширыуланы кеслерине къараргъа заманлары да табыла болмаз. Таулу тиширыула юйюрлерине бек сакъдыла, аны ючюн алагъа хурмет-ыспас этеме. Алай мен аланы кеслерин бегирек сюерге, багъаларгъа чакъырлыкъ эдим. Атам: «Кесинги башхаладан эниш этме, алай бийикге да салма», - деп юйрете эди да, мени айтырыгъым да алайды.