Къабарты-Малкъар инвестицияланы къыйматлы хайырланады

Минеральные Воды шахарда бошалгъан Кавказ инвестиция форум регионлагъа инвестиция проектлерин туура этерге эм инвесторланы Шимал- Кавказ федерал округну регионларына чакъыргъаны бла аламат майдан болгъанын кёргюзтгенди. Россей Федерацияны экономика ны айнытыу  министри Максим Решетников форумну пленар сессиясында сёлеше быллай кёрюмдюлени келтиргенди: арт беш жылны ичинде Шимал-Кавказ федерал округну экономикасына 5,2 триллион сом бёлюннгенди, аны хайырындан мында кёрюмдюле тутхучлудула эм белгиленнген мардаладан эсе алгъа барадыла.

Къабарты-Малкъар Республика экономикасына инвестиция проектлени хазырлагъаны бла Шимал-Кавказ федерал округда алчыланы санындады. Ставрополь край 645 миллиард сом бла биринчиди, КъМР экинчи жердеди, инвестиция проектлери уа 466 миллиард сомдан атлайдыла. Экспертлени айтханларына кёре, аллай кёрюмдюле республиканы правительствосу инвестиция болумну игилендириу бла байламлы тохтамай ишлегенини хайырындан болгъанды. Уллу бизнес кесини ырысхысын иги онгла къайда къуралгъанларына кёре эм власть бла байламлыкъ ачыкъ боллукъ жерге салады.

Сёзсюз, республиканы экономикасын алгъа элтирик бёлюмлеринден бирине туризм саналады. Къабарты-Малкъар Минги тауну этеклеринде эм Нальчикде сау жылны ишлеген федерал курортну къураргъа ышангылы атламла бла барады. Быйыл Кавказ инвестиция форумда республиканы ара шахарында курорт кластерни айнытыу бла байламлы беш келишим этилгенди. Аланы жашауда бардырыу 12 минг ишчи жерни къараргъа онг берликди эм башы уа алгъын заманладача Нальчикге битеусоюз магъанасы болгъан курортну аты къайтарыллыкъды эм бир жылгъа 8 миллион туристни алыргъа онг къураллыкъды, деп билдиреди ГКУ «КБР-Медиа».