Энергетикле не тюрлю болумгъа да хазырдыла

«Россети Шимал Кавказ» компанияны Къабарты-Малкъарда бёлюмюнде – «Каббалкэнергода» Терк районну электрокюч сетьлерини мурдорунда юйретиуле ётгендиле. Аны ким эсе да биреу бийик вольтлу (10 кВ) электрокюч ызланы чыпынын улоу бла къакъгъандан сора, Арыкъ элде жашагъанла (битеу да юч минг адам) эмда анда социал учрежденияла токсуз къалгъандыла деген сылтау бла башлагъандыла.

Алай болгъанын эшитгенлей,  диспетчерле элни электрокюч бла башха амал бла жалчытыугъа кёчюргендиле. Аны жерине уа, мадар этерча, тийишли бригаданы мычымай жибергендиле. Энергетикле терк къармашып, ызны жангыртхандыла, аны бла элни алгъынча жалчытыу амалгъа кёчюргендиле.

«Юйретиулеге къатышханла бар борчларын тынгылы тамамлап, тюрлю-тюрлю осал болумлагъа тынгылы хазыр болгъанларын туура этгендиле», - дегенди «Каббалкэнергону» баш инженерини орунбасары, бёлюмню сетьлеге оноу этиу арасыны таматасы Аслан Темирканов.

Жашагъан жеринг ючюн къол кётюр

Тапландырыллыкъ объектлени сайлау жаны бла Битеуроссей къол кётюрюу жумуш башланнганды, деп билдиргендиле КъМР-ни Къурулуш эм ЖКХ министерствосундан.

Бу иш «Тап шахар болум къурау» федерал проекти чеклеринде бардырылады. Анга 14 жыллары толгъан инсанла быйыл 12 июньнга дери къатышып, кеслери жашагъан регионну тапландырыугъа къошумчулукъ этерге эркиндиле. Къол кётюрюу zagorodsreda.gosuslugi.ru сайтда барады.

Бу проект РФ-ни Президентини оноуу бла 2018 жылда башланнганды. Аны магъанасын элледе бла шахарлада адамлагъа таплыкъны эмда саулай болумну игилендириуде кёрюрге боллукъду. Сора инсанланы быллай жумушлагъа къатышыргъа чакъырыуда да. Ол бары да «Жашаугъа инфраструктура» деген миллет проектни бир кесегиди.

Къабарты-Малкъарда уа быйылгъы къол кётюрюуге 25 жамауат тийре къатышырыкъды. Нальчик, Прохладный  эмда Май шахарлада ючюшери, Терк, Чегем, Басхан эмда Нарткъала шахарлада, сора Къашхатауда, Залукокоаже эм Баксанёнок элледе экишери.

Кёп сабийли юйюрлени онгдурур хыйсап бла

Къырал медицина организацияла кёп сабийли юйюрледе сабийлени алты жылларына дери дарманла бла хакъсыз жалчытыргъа боллукъдула. Тийишли бегимге РФ-ни Правительствосуну Председатели Михаил Мишустин бу кюнледе къол салгъанды.

Сёз жашаугъа эм магъаналы дарманланы, ол санда врач жазып хайырланыргъа тийишли антибиотиклени, ачытыуну эмда иссиликни селейтген препаратланы юсюнден барады.

Быллай сабийлеге льготалы рецептни жарашдырып, ол дарманланы алыр ючюн, юйюрле алгъын регионда медицина организациялагъа барыргъа керек эдиле. Энди уа ол жумушну федерал поликлиникалада (сабий алада эсепде эсе) тамамларгъа боллукъду - бу оноу аны къайда женгил этеди.

Бу иш РФ-ни Президентини «Кёп сабийли юйюрлеге социал жаны бла себеплик этиуню юсюнден» буйругъун толтурууну чеклеринде бардырылады.