«Жамауатыбызгъа энтта кёп жылланы жараргъа сюеме»

Бу кюнледе Къабарты-Малкъарны Журналистлерини биригиулерини правленини жыйылыуу болгъанды, анда журналистикада бийик жетишимлеге жетген, къыралыбызны маданият эм тарых хазнасын сакълаугъа, союзну айнытыугъа уллу къыйын салгъан инсанла белгиленнгендиле. 

Саугъаланнганланы араларында Орус география обществону регионда Жаш тёлю арасыны башчысы,  журналист эм краевед Мокъаланы Тенгиз да болгъанды, анга  къууанчлы халда жер-жерли биригиуню башчысы  Заур Жилясов Россейни Журналистлерини союзуну «Адамлагъа болушханы ючюн» алтын майдалын бергенди. Бу майдал бла социал жарсыуланы кетерирге болушхан неда адамлагъа билеклик этген журналистле саугъаланадыла.

Тамамлагъан ишине быллай бийик багъа бичгенлери ючюн биригиуге ыразылыгъын билдире, Мокъаланы Тенгиз быллай саугъала анга жангызда журналистгеча угъай, жамауат ишге къайгъыргъан инсаннгача уллу магъананы тутханларын чертгенди. «Сабийле эм жаш тёлю бла бардыргъан башламчылыкъларым саулай да жамауатыбызгъа хайыр келтиргенлерине, жаш адамлагъа жашауда жерлерин табаргъа болушханларына, аланы осал къылыкъладан, хаталы ниетлени къуугъанладан сакъларына себеплик этерлерине жюрекден ышанама. Бу иш бла энтта кёп жылланы кюреширге къарыуум жетерине мурат этеме», – дегенди ол.

Мокъаланы Тенгиз Россейни Журналистлерини союзуна  2015 жылдан бери киреди, Орус география биригиуню «Альтаир» жаш тёлю арасын къурап, кёп заманны анга башчылыкъ этгенди, бюгюнлюкде аслам патриот, жаш тёлю, турист-краеведние башламчылыкъланы къурайды эм бардырады.