Электрокюч бла жалчытылыннганланы санына къошулгъанды

Быйыл  «Россети Северный Кавказ» – «Каббалкэнерго» биригиуню келечилери биринчи кварталда ток ызлагъа   423 хайырланыучуну къошхандыла. Ол санда Нальчикде  Баш водозаборда суу тазалагъан сооруженияны, Эски

Черекде жюз сабийге  садикни, Элбрус, Зольск, Басхан эм Лескен районлада межгитлени да. Саулай алып айтханда, ала 19,2  мегаватт (МВт) электрокюч бла жалчытылыннгандыла.

Сагъынылгъан кезиуде энчи иелиледен бла организацияладан ток ызлагъа къошулурча 584 заявка берилгенди.  Аланы электрокюч бла тынгылы этерча 29,6 МВт. берирге керек боллукъду. Бу жаны бла иш къолгъа алыннганды эм тилеклери толтурулурча мадар этиледи.

Эсге сала айтсакъ, жангы хайырланыучуланы ток ызлагъа къошарча эм электрокюч бла тынгылы жалчытырча жумуш  энергетиклени баш борчларындан бирине саналады. Аны себепли бюгюнлюкде «Россети»  биригиуде сетьлеге къошулургъа сюйгенлеге таплыкъгъа электрон халда  заявка берирча сервис ишлейди. Ол санда Портал-ТП.РФ сайтда энчи кабинетге кирип, ток ызгъа къошарча заявка берирге эм къаллай бир  электрокюч керек болгъанын да белгилерге жарайды.