Эм эски юйледен бирин жангыртырыкъдыла

Нальчикни курорт тийресинде,  Долинск микрорайонунда  19-чю ёмюрню алларында ишленнген, маданият хазнагъа саналгъан эм къырал бла сакъланнган  юй сюеледи. Мында 1920 жыллада саулукъларын кючлер хыйсапда келип,  Ленинни жолдашлары, эр бла къатын Пантелеймон бла Ольга  Лепешинскийле жашагъандыла.

Бюгюнлюкде жашау журт тозурап оюлургъа жетип турады. Ичине къоркъмай адам кирирча тюйюлдю. Болсада республиканы Правительствосуну кенгешинде  анга тынгылы ремонт этип, жангыртырча документ къабыл этилгенди.   Болсада проектге кёре,  ишлени башларгъа эркинлик берилирча  РФ-ни Маданият министерствосуну  бла регионну Правительствосуну  арасында тийишли келишим керекди.

 - Лепешинскийлени дачаларыны  республикагъа уллу магъанасы барды. Ол себепден регионну Правительствосу аны жангыртыргъа инвестор излерикди. Быйылдан кеч къамай тийишли документациясы да  жарашдырыллыкъды,- дейди КъМР-ни маданият хазнагъа кирген объектлени сакълау жаны бла къырал управлениясыны таматасы   Олег Гонтарь.

Объект жангыртылгъандан сора,  мында кёрмючле, презентацияла, тюбешиуле  эм башха акцияла да бардырылырча мадар этилликди.
Эсге сала айтсакъ, 1886 жылда инженер-технолог Пётр Павлович Долинский, юй бийчеси Екатерина Долинская  Нальчикни къатында  50 десятин алып, сагъынылгъан эки къатлы юйню салгъандыла, мюлк да къурагъандыла. Ызы бла, алагъа  адамла къошула, ол кёп да бармай,  хуторгъа дери ёсгенди. Болсада Долинскийле биринчи юйлеринде жаланда эки жыл жашагъандыла.  Бюгюнлюкде уа  ол жерлешлерибизге Лепешинскийлени журтларыча белгилиди. Бир кезиуде  жашау журт 1-чи номерли санатоий деген атны да жюрютгенди, мында белгили врач эм академик Ольга Лепешинская туберкулёздан ауруугъанлагъа бакъгъанды.