Байрамны байрагъы – къаяланы биринде

Чегем ауузунда къаяладан биринде депутатла «Россейли парламентаризмге – 120 жыл» деген жазыуу бла байракъны чыгъаргъандыла. Ёрлеу ата журтлу парламентаризм къуралгъан кюннге жораланнганды.

Жолоучуланы къауумуна КъМР-ни Парламентини башчысыны орунбасарлары Жанатайланы Салим бла Мурат Карданов, Промышленность, транспорт, связь эм жол мюлк жаны бла комитетни башчысы Марат Калмыков, Жамауат къоркъуусузлукъ эм коррупциягъа къажау комитетни таматасы Михаил Кривко, Жаш тёлю палатаны келечилери киргендиле.

Быйыл жаз башында кюнню халы хар сагъатдан тюрленнгенине да къарамай, насыпха, жолоучулагъа жылы кюн тюбегенди. Законла чыгъарыучула юч минг метрден аслам бийикликге ёрлегендиле. 

- Жол ариу ётгенине бек къууанама. Бу кюн барыбызны да эсибизде кёпге дери къаллыкъды. Бютюнда аны тарых магъаналы жумушха жоралагъаныбызны эсге алсагъ а, ол унутулмазлыкъ сунама,- дегенди Жанатайланы Салим. Ол таугъа чыгъыуну хазырлагъанлагъа ыразылыгъын билдиргенди. 

Артха жолоучула белгилеген замандан эсе терк къайтхандыла. Ала айтханларыча, жолоучулукъ алагъа сейир сезимле бергенди, аны бла бирге уа мындан да уллу жетишимле болдурургъа кёллендиргенди. 

КъМР-ни Парламентини пресс-службасы.