Шуёхлукъну кючлендириуге алланып

Къабарты-Малкъар къырал университетде «Россейни халкъларыны бирлиги: кёп тюрлюлюкден келлик заманны кючюне дери»  илму-практика конференция бардырылгъанды. Ол Россейни халкъларыны бирлигини жылына жораланнганды. Анга студентле, преподавательле эмда жамауат биригиулени  келечилери къатышхандыла. Ала миллетле аралы келишиулюкню эмда  бир ниетлиликни магъанасыны юсюнден сёлешгендиле, аланы сакълауну амалларын сюзгендиле.

Университетни жаш тёлю политика, юйретиу иш эм социал соруула жаны бла проректору Беслан Назранов шёндюгю заманда къыралны айнытыуда келишиулюкню бла бирликни кючлеуню стратегия магъанасы болгъанын чертгенди.

– Миллетлени араларында келишиулюкню кючлеу – жаланда къыралны борчу тюйюлдю, ол бизни харкюнлюк ишибизди эмда энчи жууаплылыгъыбызды. Биз кёп тюрлюлюк уллу кючге къалай бурулгъаныны, бир бирге хурмет этиу, бир бири бла сёлешиу келлик заманыбызны мурдору  бола баргъаныны юлгюсюн кёргюзтюрге керекбиз», – деп, Беслан Назранов бу конференция жангы башламчылыкълагъа жол ачарыгъына ышаннганын билдиргенди.

Орус тарыхны бла маданиятны «Вече» арасыны таматасы Роман Литвинов, Къабарты-Малкъарны жаш тёлюсю, саулай Россейде тенглерича, къыралны келир заманы ючюн жууаплылыкъны боюнларына алыргъа хазыр болгъанына ышаннганын билдиргенди. Жууаплылыгъ а адет-тёрелеге хурмет этиуде, жамауат жашаугъа тири къатышыуда эмда огъурлу ишле этерге итиниулюкде ачыкъланнганын чертгенди.  «Къабарты-Малкъарда, битеу Россейдеча, жаш тёлю келлик заманнга бош алай къарап къалмай, озгъан заман бла да байламлылыгъына сакъ болгъанын кёребиз. Тамата тёлюлени тёрелерин андан ары бардырыу а  жетишимлиликни ачхычыды. Жаш адамла кючлю къырал  тамырларына сый бериуге таяннганын ангылайдыла эмда кеслерини кюч-къарыуларын туугъан журтларын, битеу къыралны да айныуларына салыргъа хазырдыла», – деп къошханды ол.

Конференция стратегия сессия халда ётгенди. Аны кезиуюнде вузну илму клубларына бла организацияларына жюрюген студентле экспертлени насийхатлыкълары бла грант конкурслагъа башламчылыкъларын бла проектлерин жарашдыргъандыла. Модератор, КъМКъУ-ну юретиу иш жаны бла  управлениясыны таматасы Залина Гергова  оюм этгенден, къуру сюзюу бла чекленип  къалмай, бирликни кючлеуню эмда ол ишде студентлени жерлерин белгилеуню шарт жолларын излерге керекди.

Студентле жыйылыуну бу халда бардырыуну дурус кёргендиле. Командада ишлерге эм керти да хайыр келтирирге боллукъ башламчылыкъла къураргъа бек сейир эди. Артыкъда  экспертлени оюмларын эшитген, аладан бизни проектлерибиз бла байламлы болушлукъ алгъан бютюнда магъаналы эди, дегендиле ала.

«Россейни халкъларыны бирлиги: кёп тюрлюлюкден келлик заманны кючюне» деген илму-практика конференция бирлик ол акъыллы ишлени бла башламчылыкъланы хайыры бла къуралгъан зат  болгъанын кёргюзтгенди. Жаш тёлю, не ызны сайлагъанын эмда хунерлигин ачыкълап, иги тюрлениулени алгъа элтген кюч болургъа,  кючлю эмда бирикген Россейни къурулушун андан ары бардырыргъа хазырлыкъларын жангыдан кёргюзтгенди, деп билдиргендиле КъМКъУ-ну пресс-службасындан.