Жашауну сакъларгъа боллукъ эсгертиуле

Жаз башы каникулланы аллында «Россети Северный Кавказ» – «Каббалкэнерго» биригиуню келечилери Майский шахарны 1-чи номерли гимназиясыны окъуучуларына ачыкъ дерс бардыргъандыла. Аны чеклеринде электрокючню къоркъуусуз хайырланырча шартла бла шагъырейлендиргендиле эм сабийлени да  сорууларына жуупла бергендиле.

 Май районну  электросетьлерини специалисти Маргарита Озерова энергокюч объектлеге жууукълашыргъа, трансформатор подстанциялагъа  кирирге, ток чыбыкъ юзюлсе,  сегиз метр чакълы  кенгде турургъа, бузулгъан  электроприборла бла хайырланыргъа жарамагъанын эслерине салгъанды.  
Андан сора да, ток ургъан адамгъа заманында тийишли халда биринчи  болушлукъ берилсе,  жашауун сакъларгъа жарагъанын да билгендиле. «Россети» биригиуню «ВКонтакте» социал сетьде  электрокюч бла къоркъуусуз хайырланыргъа юйретген Маша Лампочкина деген энчи  проекти бла  да шагъырейленнгендиле.  Маша гитчеле игирек ангыларча оюн халда, комикслени эм   мультфильмлени юлгюсюнде къоркъуусузлукъну жорукъларын билдиреди.

Дерсни кезиуюнде практика жанына да аслам эс бурулгъанды. Ол санда сабийлени ток баргъан жерде кеслерине заран жетдирмей  жюрюрге юйреннгендиле. Энергетиклени энчи кийимлери, оборудованиялары да неге жарагъанларын билгендиле. Бютюнда бег а  «Гоша» деген робот-тренажёр  бла мастер-классны жаратхандыла.  Аны бла  бирге къыйын болумгъа тюшген  адамгъа биринчи болушлукъ этерге юйренип, сынамларын кючлегендиле.

Тюбешиуню ахырында электрокюч жаны бла къоркъуусузлукъну жорукъларын билдирген эсгертиуле юлешгендиле эм бирге суратха  тюшгендиле.