Терк болушлукъ тапдыргъан бёлюмде аслам саусуз болушлукъ алгъандыла

КъМР-ни Республикалы клиника больницасыны мурдорунда терк болушлукъ тапдыргъан шёндюгю стационар бёлюм ачылгъанды, ол къыралда эм иги сынамгъа саналгъанды. Россей Федерацияны Саулукъ сакълау министерствосуну бла Правительствосуну себеплиги бла ишленнген приём бёлюмню жангы корпусу алчы медицина оборудование бла жалчытылыныпды эмда суткагъа 100 саусузгъа деп тергелипди. РКБ-ны терк болушлукъ тапдыргъан жангы стационар бёлюмюнде медицина болушлукъну 6 мингден артыкъ саусуз алгъандыла. Аны юсюнден КъМР-ни Саулукъ сакълау министерствосуну пресс-службасы билдиреди.

Приём бёлюмню жангы корпусу 1200 квадрат метр кенгликдеди. Аладан 984 квадрат метри ишчи отоулагъа бла палаталагъа деп бёлюнюпдю, 216 квадрат метр а – коридорлагъа бла служебный бёлеклеге. Мекям шёндюгюлю оборудование бла жалчытылыныпды, ол санда УЗИ, эндоскопия, функционал диагностика кабинетле, клиника-диагностика лаборатория, рентген кабинетле эмда КТ. КТ-кабинет противошоковый операционный, реанимация зал бла байламлыкъдады, 6 жери бла, динамика къарауну залы уа 10 саусузгъа деп тергелгенди.

Приём бёлюм юч тийреге бёлюнюпдю: жашил – табыракъ халда болгъан саусузлагъа, сары – халлары орталыкъ болгъан саусузлагъа эмда къызыл – къыйын эмда бек къыйын халлы саусузлагъа. Ол амал тинтиулени, багъыуну тийишлисича бардырыргъа себеплик этеди.

Бёлюмде суткагъа 100 саусузну ётдюрюрге амал барды, къыйын болумлада – 150-ге дери. Къыйын болумла чыкъсала, процедура кабинетлени гитче операционныйлеге бурургъа жарарыкъды.

Саусузну мындагъы тёшекде болуууну орталыкъ заман болжалы 4,6 койко-кюннге дери къысхартылгъанды, жатар жерлеге келиулени алышындырылып туруулары уа кёбейгенди.

Бёлюм алчы медицина технологияланы сингдиреди, ол санда «фаст-трек» низамны да, бютюнда бек ауур эмда бирден бир ненча жарасы болгъан саусузлагъа. Аны хайырындан болушлукъ заманында, бийик даражада тапдырылады, багъыуну заман болжаллары къысхартылынадыла эмда медицина жумушланы качестволары игиленеди.