Огъары Малкъарда – «Голлу»

Огъары Малкъарда Жангоразланы къонакъ юйлеринде «Голлу» деген эрттегили тёрели таулу байрам ётгенди. Барыбыз да билгенден, аны малкъарлыла сабан ишле башланырны аллында бардырып болгъандыла.

Бу байрамны кёпле сакълай эдиле десем, ётюрюк болмаз. Эллерибизден баргъанланы санамай, туристледен окъуна жюзден артыкъ адам келген эди. Къонакълагъа миллетибизни ахшы адет-тёрелери, аш-сууу, тепсеулери бла жырлары кёргюзтюлгендиле.

Эр кишиле малны къалай сояргъа кереклисин кёргюзтюп эришгендиле, базук сындырыуда къол кючлерин сынагъандыла. Тиширыула бла сабий къызчыкъла уа хычинле, хыбыртла этиуде хунерлерин кёргюзтгендиле. Бу ишге белгили повар Хочуланы Альберт башчылыкъ этгенди.

Жипни тартыуда уа жыйылгъанла эки къауумгъа юлешинип эришгендиле. Жарыкъ тепсеуле бла жырла  байрамгъа энчи къууат бергендиле. Анга уа «Балкария» тепсеу ансамбль бла «Жашлыкъ» жырчы къауум  юлюшлерин къошхандыла.

Ол кюннге деп дизайнер-модельер Созайланы Жамиля (Мила Керефф) шапа къызлагъа бизни миллет чепкенибизге ушагъан жыйрыкъла тикгенди.

Мал союуда эм устагъа «Балкария» ансамбльни солисти Анахаланы Мурат  саналгъанды. Ол уча бла саугъаланнганды.

Экскурсовод Малкъондуланы Жаннета байрамгъа республикагъа солургъа келген турист къауумну элтип баргъанды. Ол быллай  башламчылыкъла миллетибизни адет-тёрелерин кенг жайыугъа эм ёсюп келген тёлюлерибиз аланы билирча этерге болушханларын чертип айтханды. 

– Бизни хар бирибизни да борчубуз бу ахшы адетлерибиз сакъланырча этиудю. Ол а быллай сейир байрамланы къурау амалланы юслери бла боллукъ ишди, – дегенди Жаннета.