Уллу кёллюлюк игиге келтирмез

Жылыула келип башлагъаны бла бош заманларын суу боюнунда, кёлледе ётдюрюрге чыкъгъанла асламыракъ боладыла. Алай быллай солуу зауукълукъдан сора, къоркъуу да келтирирге боллугъун а кёпле билмейдиле. Ол а сагъынылгъан жерледе тартылып тургъан электрокюч ызладан чыгъады.

Энергетикле айтханларыча, бийик вольтлу ток ызлагъа жууукъ барыргъа чыртда жарамайды. Сёз ючюн, кючю бир киловольтха жетмегенлени неда энергетика объектлени тёгереклеринде къоркъуусузлукъ тийрелери эки метр бла чекленеди. Аны кючю 6-10 кВ бола эсе – 10, 35 кВ – 15, 11 кВ эсе уа – 20 метрден жууукъ барыргъа жарамайды. Алайлада чыпынлагъа ёрлерге, кёлледе чабакъ тутаргъа жарамагъанын ангылатхан эсгертиу белгиле орнатыладыла. Бу затлагъа уллу кёллюлюкню ахыры бек осал боллукъду.

Къысхасы: ток ызла неда электрокюч объектле болгъан жерлеге жууукъ барып ойнаргъа, кёлледе жууунургъа, чабакъ тутаргъа, ызлагъа абери тагъаргъа жарамайды. Аны юсюнден тамата тёлю, сабийле да билирге керекдиле.

Энергетикле дагъыда кёк кюкюрегенде чабакъ тутаргъа жарамагъанын да эсгертедиле. Кюнню халы тюрленип, булутла да жууукъдан-жууукъ келип башласала, чабакъ тутууну олсагъат къоюп, кёлден не къадар узакъгъа кетерге керекди.

Белгилисича, суу токну болмагъанча иги ётдюреди. Элия кёлге урса, электрокюч аны жагъасындан жер бла энтта да жюз метр тёгерекге жайылады. Бирледе уа элия суугъа угъай, кёлню къатында жерге да урургъа болады. Аны ючюн, айтылгъаныча, ол тийреден терк къутулургъа керекди.

Сагъынылгъан тийрелеге кирирге жарамагъаныны юсюнден РФ-ни Правительствосуну 2009 жылда 24 февральдан 160-чы номерли бегими бла тохташдырылгъан жорукъла бардыла. Аланы сансыз этгенлени хаталарындан электрокюч бла жалчытыу тыйылса, тазир салынырыкъды. Инсанлагъа аны ёлчеми – 5-10, къуллукъчулагъа – 10-20, предприятиялагъа бла организациялагъа уа – 100-200 МРОТ тенгли боллукъду. Дагъыда сюд оноу этсе, ала салгъан хатаны багъасы тергелип, аны да тёлерге тюшерикди.