Къолу - уста, сёзю - ариу

Инжибай жашауун медицина бла байламлы этерге гитчелигинден сюйгенди. Аны атасы Бапыналаны Ханалий пенсиягъа чыкъгъынчы поликлиникада ишлегенди. Асламлагъа болушханды. Къоншуда, тийреде адам ауруса, биринчи анга келип болгъандыла. Къыз а, атасы этгенни кёрюп, андан кёп затха юйреннгенди. Абадан классда окъугъанында, ахлуларындан биреу ауруса, укол этгенди, ачыгъаннга байлау салгъанды. Аны ол хунерлигин кёргенле: «Сен медик болургъа керексе, анга деп туугъанса», - дей эдиле.

Алай къызчыкъны къоллары юй жумушлагъа да тап жарашхандыла. Ол анасына школгъа жюрюп башлагъынчы окъуна жарап тебиреген эди. Ненча тауукълары,баппушлары, къазлары болгъанларын андан эсе ол иги билгенди. Абаданыракъ болгъанында уа, ишден арып келген анасын аяр ючюн ийнек сауаргъа да юйреннгенди. Инжибай не жумушну да къууанып, кёлленип тамамлай эди. Анга ала къыйын кёрюнмей эдиле. Къызчыкъны тирилигин кёрюп, устазла да кёп затла буюра эдиле. Аланы айтханларын да ол жерге салмай тамамлагъанды. Юйде, школда да анга ауурлукъ жетгенине да къарамай, ол жаланда «бешлеге», «тёртлеге» окъугъанды.

Шалушкада школдан юйге жол узакъ эди. «Маршруткала» уа ол заманда хазна терк жюрюмей эдиле. Къызчыкъла юйден окъуу юйге, андан да бирге къауум болуп келиучю эдиле. Ма ол заманлада уа къаллай усталыкъ сайларыкъларын да бир бирге айтып болгъандыла. Мектепде окъууну бошагъанларындан сора, къызчыкъланы хар бири да жюреги сайлагъан  жолгъа туруп, сюйген билимлерин алып, бирери бирер жерге кетгендиле. Инжибай а муратына кертичи болду. Нальчикде медицина училищени къызыл дипломгъа бошады. 2000 жылда уа 2-чи номерли шахар клиника больница ачылады да, ары барды. Анда уа кастингден ётерге керек эди. Баш врач Ботталаны Хадис къызны билимлилигин, къармашыулулугъун да жаратады, заявлениясына олсагъат къол салып: "Угъай демей эсенг, бюгюнден ишлеп башларгъа боллукъса",-дейди. Алай бла къыз больницаны бёлюмлеринден биринде медсестра болуп алты жыл ишлейди.

Усталыгъын, билимин ёсдюрюр мурат бла Москвагъа барып, анда уллу аптекаладан биринде провизорлукъ да этеди. Алты жылдан а биягъы больницагъа къайтады. Ара шахарда жыйышдыргъан сынауу аны бюгюннгю ишине уллу себеплик этеди. Ботта улу аны гинекология бёлюмде тамата медсестрагъа салады. Бусагъатда ол бийик категориялы специалистди. Аны борчу саусузлагъа дарманла бериудю, бёлюмде халгъа къарауду, келген саусузланы тийишли жерлеге жатдырыуду, алагъа тап болсун деп къайгъырыуду.

Асламында биз, журналистле, врачланы юслеринден жазабыз, алагъа махтау салабыз. Алай саусуз аягъы юсюне терк болууда медсестраны къыйыны да аз тюйюлдю. Бирде уа доктордан асламды деп окъуна айтырыгъым келеди. Кюн сайын да Инжибайгъа ауруудан къыйналгъан адамланы кёрюрге тюшеди. Бир кесекден ала, аягъы юсюне болуп, ышарсала, жюреги хош болады. Анда аны да юлюшю болгъанын сезип къууанады. Больницада аны кёзю, къолу жетмеген бир жумуш да жокъду. Ол чапмай да жюрюмейди. Саусузладан бири анга: «Сени атынга Инжибай угъай, Энерджайзер деп атаргъа керек эди»,- деп бош айтмагъанды. Ботталаны Хадис а: "Бу къызны  аякъларында моторлары болур, ансы былай арымай, талмай къалай айлана болур, бек сейир этеме",-деген эди. Бёлюмню таматасы Любовь Владимировна Мидова уа аны юсюнден былай дегенди: «Билемисиз, бир адамла бардыла да, ала кеслери да ангыламай, тамамлагъан ишлери, кеслерин жюрютгенлери, кёз къарамлары бла да тёгерекдегилени жашауларын женгил эм ариу да этедиле. Ма Инжибай аллайладанды".

Инжибай кёзлерини жарыкълыкълары, ышарыуу бла да не къыйын саусузну да аягъы юсюне саллыкъды деп, кёпле айтып эшитгенме. Ма аллай тири, тюз ниетли, ариу къылыкълы, чырайлы къыз ишлейди Хасания элге кирген жерде орналгъан 2-чи номерли шахар клиника больницаны гинекология эмда калопроктология бёлюмлеге баш медсестра болуп.

Инжибай жашауун къабартылы жаш бла байламлы этгенди, бюгюнлюкде эки жаш ёсдюреди. Кюн сайын ишге уа Терекден жюрюйдю. Аллай жигит къызгъа ол неди?