Сёз хаж къылыргъа хазырланыуну юсюнден баргъанды

Нальчикни Ара межгитинде  быйыл хаж къылыргъа хазырланыугъа жораланнган жыйылыу болгъанды. Анда сёлеше, КъМР-ни Муслийманларыны дин управлениясыны таматасыны орунбасары Алим Сижажев  хаж къылыу саулугъу, къолайы да болгъан хар муслийманны сыйлы борчу болгъанын эсгертгенди. Ол быйыл бу сыйлы жолоучулукъгъа тебирегенлеге, муратларына жетерлерин эмда юйлерине сау-саламат къайтырларын тежегенди.

Ызы бла бизни республикадан сыйлы жерлеге тебирегенлени башчылары сёлешгендиле. Герпегежни иймамы Бёзюланы Хаким элден барлыкъланы эркинлик къагъытлары хазыр болгъанларын билдиргенди.

«Аланы Меккяда тохтарыкъ отоуларын хазырлатханбыз, бизни тынгылы автобусла сакълайдыла, ала  Мединагъа бла Меккягъа элтирикдиле, артха да къайтарлыкъдыла. Андан сора да,  жолоучуланы аш-суу бла жалчытыуну къайгъысын да кёргенбиз. Бусагъатда Нальчик эмда Басхан шахарланы ара межгитлерине жюрюгенлени хаж къылыуну жорукъларына юйрете турабыз. Бизни бла хажгъа адамланы 10 жылдан аслам заманны ичинде  элтген эки уста доктор да биргебизге боллукъдула, ала биринчи  медицина болушлукъну тапдыргъанлай турлукъдула.

Сыйлы жумуш бла атланнганланы  хадж къылыргъа бир ненча кере баргъан уста адамла шериат жаны бла да юйретгенлей турлукъдула. Ала арап тилни уста биледиле, жолоучулагъа хар атламларында да эс тапдыргъанлай турлукъдула. Къысхасы, жолоучулагъа уста башчыла нёгерлик этерикдиле. Аллах хар бирине да дин борчларын тийишли толтурургъа онг берсин, тилеклерин да къабыл этсин», - дегенди иймам.

«Хадж Эльбрус» компанияны башчысы Къазакъланы Алхас а бу жол «Аэробус А-320» самолётла хайырланыллыкъларын билдиргенди. «Заманнга кёре, багъала кётюрюлген иш этселе да (отлукъну, жабыкъ хауа жолланы, айланып учаргъа тюшгенни сылтаулары бла),  программа толусунлай тамамланыллыкъды. Сауд Аравиядан эм россейли оноучуладан да битеу керекли къагъытла алыннгандыла, хар зат да хазырды», - деп къошханды.

«Нальчик» аэропортну таматасы Сергей Айнетдинов а октябрьде «Нальчик» аэропорт «Джазира» авиакомпанияны халкъла аралы аудитинден ётгенин билдиргенди. Самолётну отлукъ, къоркъуусузлукъ системалары, техника жаны бла хазырлыгъы тинтилгендиле. «Аудит биринчи кереден ётюп къалмагъанды, болсада хурметли муфтий Хазраталий Джасежевни болушлугъу бла белгили инфраструктура тюзетиуле этилгендиле», - дегенди ол.

Къазакъланы Алхас а алагъа Кърымны аккредитациясы болгъан «АВН-тур» турфирмасы муслийманларыны дин управлениясыны официал къагъытын ийгенлерин айтханды. Ол билдиргеннге кёре, арт жыллада хажиликге автобус бла  барыу къалгъанды, ол къоркъуусузлукъ бла байламлыды. Тюзюнлей рейсле бардырыргъа, тинтиуледен сора, къыралда жаланда беш аэропорт эркинди: Москвада «Домодедово», «Махачкала», «Къазан»,  Сочи эм «Нальчик». Аны бла байламлы бир-бир регионлада чырмаула чыкъгъандыла. Дагъыда Кърымны бла Россейни ара жаныны муслийманларыны дин идаралары жолоучулукъда болушургъа, алагъа да «Нальчикден» учаргъа себеплик этерге тилекле келгендиле.

- Республиканы оноучулары, жууаплы министерствола, Муслийманланы дин управлениясы бюгюн бу жумушла бла кюрешеди, алагъа болушурча къолдан келгени этиледи.  Аланы Нальчикден башха жерден учаргъа бир тюрлю онглары, мадарлары да жокъду. Эки къауумда 750 муслийман барды, аладан 90-ны бизни республиканы инсанларыдыла, 70-си - Къарачай-Черкесни. Ала Россейни ара жаныны муслийманларыны дин управлениясыны квотасы бла барадыла,-деп ангылатханды ол болумну эмда битеу да бирге бизни республикадан 1400 адам учарыкъларын, 8 рейс къураллыгъын белгилегенди.

Сергей Айнетдинов а къошакъ рейсле бёлюу  иш эки кюн мындан алгъа башланнганын баям этгенди. «Биз ишибизни Таможня управление эмда Роспотребнадзор бла бирге  бардырабыз. Эсигизге салайым: Кавказда «Джазираны» бойсунууна эки аэродром бёлюннгенди – Махачкалада бла Нальчикде»,- дегенди.