Чабакъ тутуучуланы эслерине

Къабарты-Малкъарны Табийгъат байлыкъла эмда экология министерствосу быйыл 15 апрельден башлап 15 июньнга дери республикада череклени неда алагъа къошулгъан сууланы бир кесегинде чабакъла ырхыз салгъан кезиу боллугъун билдиреди.

Аны чеклеринде Уллу Золка бла Гедуко черекледе толусунлай, Чегем сууну Басханнга къошулгъан жеринден башлап Лячинкъаягъа дери, Урван сууну Герменчикден башлап анга Нальчик суу къошулгъан жерине дери, Нальчик сууну Акъ-Суу элден башлап Урван суугъа къошулгъан жерине дери, Черек сууну темир жол кёпюрден башлап «Жангы Акъсыра» плотинагъа дери, Малка сууну Малка эм Хабаз бла чекленнген, Урух сууну Урухдан, Лескен сууну уа Эски Лескенден башлап Терк суугъа къошулгъан жерлерине дери эмда Шалушка сууну (анга тюшген Каменка эм Кенже суула да) Урван суугъа къошулгъан жерине дери ауланы неда ыргъакъланы къайсы тюрлюлери бла да чабакъ тутаргъа жарарыкъ тюйюлдю.

Дагъыда бу тийреледе предприятиялагъа бла организациялагъа эмда башхалагъа бир тюрлю ишле бардырыугъа чек салынады. Чабакъ тутууда электрокючню хайырланнган адам уголовный жууапха тартыллыгъы да эсигизде болсун. Бузукълукъ этгеннге 300-500 минг сом тазир салыныргъа боллукъду, ол 2-3 жылны ичинде ишлеген хакъын тёлерикди неда тутмакъгъа эки жылгъа тюшерикди.

Хурметли жамауат! Чабакъ тутууда жорукъланы сансыз этмегиз. Черекледе бла кёлледе быллай байлыкъла келир тёлюлеге да жетерча сакъланыргъа керекдиле.