Мингден аслам бузукълукъ ачыкъланнганды

Жолда къоркъуусузлукъну игилендирир, аварияланы санын азайтыр мурат бла къырал автоинспекторла Басхан районда энчи тинтиу жумушла бардыргъандыла. Он кюнню ичинде жолда жюрюуню жорукъларына мингден аслам бузукълукъ этилгени тохташдырылгъанды.

Эсирип, жолгъа чыкъгъан водительлени ачыкълаугъа энчи эс бурулгъанды. Бу кезиуде аллай жети инсан тутулгъанды, аладан бешиси бу бузукълукъну къайтарып этгендиле. Алагъа РФ-ни УК-сыны 264.1-чи статьясына кёре терслеу материалла жарашдырылгъандыла. Дагъыда машинаны жюрютюрге энчи эркинликлерине чекле салыннган 34 инсан тутулгъанды. 

Машинаны ичинде адамланы къоркъуусузлукълары къалай сакъланнганы да сюзюлгенди. 49 автомобльде болгъанла  къоркъуусуз бауланы такъмагъанлары эмда сабийле энчи шинтикчикледе олтурмагъанлары ачыкъланнганды.   

Машинаны терезелери къаралдым этилгенлери бла байламлы бузукълукъла да  аслам эдиле – 444.

Жолда жорукълагъа бузукълукъла этгенлери ючюн административ тазирле салынып, аланы  заманында тёлемеген 150 инсан ачыкъланнганды. Сюд приставла бла бирге 40 водительни борчлары болгъанлары тохташдырылгъанды, аладан 19-суну тазирлерини саны  50-ден  кёпдю. Приставла 32 машинагъа эмда 2 инсанны мюлкюне арест салгъандыла. Водительлени бир къаууму ахчаны  ол кюн окъуна тёлегендиле. Битеу да 880 минг сом жыйылгъанды. 

Быллай тинтиу жумушла битеу республикада да бардырыллыкъдыла, деп билдиргендиле бизге КъМР-де МВД-ны пресс-службасындан.