Кёлю бла жарсыгъанын кёргюзтгенди

Алгъаракълада Нальчикден предприниматель  Улбашланы Ислам социал сетьледе  Дагъыстанда жауунладан эмда ырхыладан  бузулгъан эллеге жандауурлукъ жюк жыярча пунк ачханларын  билдирген эди. Аны тилегине кёпле эс бургъандыла. Аланы арасында (аты белгисиз болса сюйгенди) кеси термилип алгъан  мотоциклин келтирген жаш да  болгъанды. Ол темир атын жюреги бла сюйгенин,  алай, быллай огъурлу иш ючюн аны да къызгъанмагъанын, сатып хайырын кёрюрлерин  айтханды. 

Бир къауум замандан Исламгъа башха къолайлы киши келгенде, жашны хапарын билгенден сора, аны багъасы ючюн жюз минг сом тёлегенди эм байкны иесине къайтарырларын да тилегенди.

 - Кертисин айтханда, мотоциклни иеси алгъа саугъасын алыргъа унамай кёп тирелгенди. Болсада ахырында  айтханыбызны этгенди. Сора   арлакъгъа кетип, жилягъанын окъуна эслегенме. Мотоциклине олтургъанда, ол такъыйкъада андан насыплы болмагъан сунарча эди,-  дейди Ислам.

Жандауурлукъ акцияны кезиуюнде Ислам ГАЗельге  жюк болурча  пластик шешалагъа къуюлгъан   ичер суу мажарыр мураты болгъанды. Алай уллу кёллюлюк этмеген жерлешлерибизни хайырындан,  Хасавюртха  тёрт  машина  ашырылгъанды. 

Бюгюнлюкде да жерлешлерибиз гуманитар жюк жыйгъан жерге аш-суу, адамгъа биринчи керек затла да келтиредиле. Анга кёре энтта да он  ГАЗель бла эки  фура чакълы жюк эм бир миллион сом чакълы ахча да  жыйылгъанды.