Аракъыны - таза суугъа, тютюнню уа спортха алышыгъыз

Адам саулугъу, санлары берген белгилеге сансыз болуучуду, нек эсе да. Жюреги чанчса, жётел этсе, башы ауруса, охо да, дарман ичсем тохтар, деп къояды. Алай адамны чархы уллу заводха ушайды – хар  саны да бири бири бла байламлыды. Бири ауруса, кемчиликле бла ишлеп башласа – аны хатасы барысына да жетерге боллукъду, деп ангылатадыла бизге КъМР-ни Саулукъ сакълау министерствосуну Психиатрияны бла наркологияны клиника арасындан.

- Аракъы, тютюн, наркотикле, башха уулу затла уа бир «илишаннга» урадыла – адамны жашаууна. Ала бузмагъан, кемчилик салмагъан бир жер да жокъду адамны чархында. Россейни Саулукъ сакълау министерствосу бу ыйыкъны саулукълу жашауну жорукъларын ангылатыугъа жоралагъанды да, аны чеклеринде осал къылыкъла келтирген заранны энтта бир кере эсгертирге сюебиз,-дегендиле бизге клиниканы пресс-службасындан.

Сёзге, ичги затла адамны бауурун бузадыла, цирроз башланыргъа боллукъду. Дагъыда мыйыда нейрон байламлыкъланы юзеди, аны хатасындан  деменция башланырыгъына къоркъуу уллуду. Къан тамырла да ууланадыла, аны ахыры уа – инсульт.

Тютюн ичген адам жётел этгенине эс бургъан болурсуз. Ол жарсырча шартды – никотинни хатасындан санлагъа къан кереклиси тенгли жетмейди. Аны ючюн ёпкеле, къан тамырла толу кючю бла ишлеялмайдыла. Наркотиклени ичгенни жюреги осалгъа айланады, иммунитети ахырда жокъ болургъа жетеди, баууру, бюйреклери къанны тазалаялмайдыла.  

- Шёндюгю заманда адам саулукълу жашауну магъанасын ангыларгъа борчлуду. Осал къылыкъланы къоялмай эсегиз а, бизни клиникада сизге болушурча битеу онгла, мадарла да бардыла.  Алай бла саулукълу жашау эркинлик бергенин ангылап, аракъыны таза суугъа, тютюнню  уа спортха   алышдырыгъыз, наркотиклени ахырда унамагъыз,-дегендиле бизге клиникадан.