Бузукълукъну къысха заманда кетергендиле

Къабарты-Малкъарны Регионнга оноу этиу арасы (ЦУР) кёп тюрлю тилекге бла тарыгъыугъа къарайды. Аланы асламысы «Telegram», «Одноклассники», «ВКонтакте» социал сетьледен «Инцидент Менеджмент» амал бла алыннганладыла.  Кёбюсю, хар замандача, социал къоруулау, жашау журт-коммунал мюлк, тийрелени игилендириу, жолланы тапландырыу, саулукъ сакълау эм башха ишле бла байламлыдыла. Аланы хар бирине специалистле тынгылы къарап, магъаналарына кёре тийишли ведомстволагъа билдиредиле. 

Кёп болмай да,  Тырныауузда Элбрус проспектде  76-чы эм 78-чи номерли кёп фатарлы юйледе   жашагъанла таза суу басымы бла келмегенин, ол себепден  аны  тийишли халда  хайырланыргъа онг  болмагъанын айтып тарыкъгъандыла.  

Аны юсюнден ЦУР-ну  Элбрус районда билдиргенлеринден сора, къысха заманда жерине суу бла жалчытхан организацияны келечилери  баргъандыла. Аны кезиуюнде быргъы атылгъаны ючюн иги кесек суу жибергенин  тинтгендиле.

Алай бла, узакъ созмай,  энчи техниканы эм оборудованияны да хайырланып,  бузукълукъну кетерирча мадар этилгенди. Аны хайыры бла юч жюз адам ичер суу бла сылтаусуз болгъандыла.

 Эсге сала айтсакъ, Регионнга оноу этиу ара офис халда ишлемейди, «Инцидент менеджмент» бир тюрлю соруугъа эс бурур ючюн, ол социал сетьлени биринде жазылыргъа керекди. Ол санда кемчилик тынгылыракъ ачыкъланса игиди.