Районну хазырлыгъын тинтгендиле

РФ-ни МЧС-ини КъМР-де Баш управлениясы Лескен районда юйрениуле бардыргъанды. Анга район администрацияны жууаплы къуллукъчулары, тюрлю-тюрлю ведомстволаны бла министерстволаны келечилери да къатышхандыла.

  Юйрениулени кезиуюнде районда сакъланмай тургъанлай келген къыйын болумлагъа хазырлыкъны тинтгендиле. Асламлы борчла ол къыйынлыкъланы кетериу бла байламлы эдиле. Район администрацияны планына энчи магъана берилгенди. Адамлагъа керек информацияны жетдириу къалай къуралгъанына эс бёлюннгенди. Анзорей элни тийресинде къутхарыучула кеслерини хазырлыкъларын иш юсюнде кёргюзтгендиле.   Лескен районну администрациясыны таматасы Сафарби Инжижоковну башчылыгъында бардырылгъан кенгешде специалистле жиберилген халатлагъа эс бёлдюрюп, аланы кетериуню магъаналыгъа санагъанларын чертгендиле.

 КъМР-ни Къурулуш министерствосуну бёлюмюню таматасы Хусейн Сарахов билдиргеннге кёре, бу юйрениуле тийишли органланы хазыр болгъанларын бла къалгъанларын туура ачыкълайдыла эм болгъан кемчиликлени кетерирге себеплик этедиле.