Тизгинлери тамблагъы кюннге ийнандырадыла

Бу жазманы бизге жазыучу, журналист Абайланы Сакинат жибергенди. Ол къалам къарындашы Османланы Хыйсаны жангы катабы бла байламлы оюмун айтыргъа излегенди.

Османланы Хыйсаны басмаланнган китапларын окъугъан адамны кёлюн ёхтемлик толтурлугъуна ишексизме. Мен аны назмусун, хапарын неда суратда кёргенни ангылатмасын окъусам, таза сезим жюрегими толтурады. Аны дуниягъа къарамы ачыкъды, кёлю, жаны да мамырлыкъны излейди. Назму тизгинлери уа тамблагъы кюнде танг эрттени жарыкъ атарына ышандырадыла. 

Болсун алай! Кёп жашау чырмыкъладан ётген халкъгъа жарыкъ жашаргъа заман болгъанды. Ишни сюйген, къууанчны жашаугъа татыта билген миллетибизге аллай тангла атсынла, къууанчлы жырла жырлана, тойла этилсинле. 

Кёп болмай басмадан «Малкъарны уюгъан макъамлары» деген китабында Хыйса эшитген хапарларын, кеси кёзю бла керген сейирлик затланы юсюнден жазады. Аны танышлары, жууукълары узакъ элледе, жерледе кёрген, билген затларын айтадыла.

Бизни ариу Малкъарыбыз ёхтем, хунерлери болгъан адамланы жериди. Жашау этген амаллары да ёмюрледен бери чынгылда, жолсуз жерледе да болгъанды. Табийгъатны болумларын хайырлана, узакъ Холамда таш хуруланы тюзете, тапкалагъа къайдан да топуракъ келтире, будай, зынтхы ёсдюргендиле. Бичен этген жерлери уа башлары булутладан ары кетген бийикледе окъуна болгъанды. Алай ол чырмаула миллетни кёлюн кётюре, къатылыкъгъа, чыдамлыкъгъа юйретгендиле. Басханны, Чегемни, Малкъарны, Бызынгыны, Холамны жерлерини ариу адамлары ишлери, жашау халлары бла тышындан келген къонакъланы сейирге къалдыргъандыла. 

Тизгинлерин жыя, кёзлерин кётюрюп къараргъа иймене ёсген таулу къызланы суратларын да Хыйса «Балкария сквозь века» деген сейирлик китабында кёргюзтгенди. Быллай уллу излем иш миллетни хазнасыды. Окъуучу мында кёрген суратла, айтылгъан хапарла да намыс, низам таулулада бек бийикде болгъанларына шагъатды. Миллетни ол маданият байлыгъы узакъ ёмюрледен келген хазнабызды. 

Авторну башында айтхан жангы китабында хапарла анга шагъатдыла. «Жаралы къушну ахыр учууу» деген хапарда автор ёхтем таулуну сыфатын къушну сыфатында сакълайды. Къарт-къарыусуз болгъан ууахтысында окъуна, къанатлыны ёхтем къаны жыртхычлагъа азыкъ болургъа къоймайды. Жазыучу къушну сыфатында хорланмагъан, къыйынлыкъгъа хорлатмагъан жерлешлерини сыфатларын баямлагъанды. 

Ёхтем халкъны жазыучулары, тарыхчылары заманларын, билимлерин, къарыуларын да аямай, миллетим деп алай ишлейдиле. Хыйса да ол жолну тутуп, адамланы сейирлик хапарлары, сурат жыйымдыкълары бла къууандыргъанлай турлугъуна ышанабыз.