УФСБ: Законнга бузукълукъ этгени ючюн жууап тутарыкъды

 Излеу-тинтиу жумушла бардыргъан кезиуде, РФ-ни ФСБ-сыны КъМР-де Управлениясыны къуллукъчулары, республиканы полициячылары бла бирге 54-жыллыкъ нальчикчини аманлыкъчы ишин тыйгъандыла.

УФСБ-ны пресс-службасындан бизге билдиргенлерича, инсан, Интернет информация-коммуникация ызны хайырланып, бир бирни кёрюп болмаулукъ, къажаулукъ ниетлени жайгъан, башха адамны миллетине, тилине, динине, къолайлыгъына кёре сыйын тюшюрген шартланы басмалагъанды. 

РФ-ни СК-сыны КъМР-де следствие управлениясыны къуллукъчулары Россейни УК-сыны 282-чи статьясыны 1-чи кесегине бузукълукъ этилгени бла байламлы терслеу материалла ачхандыла. Законлада белгиленнгенича, быллай аманлыкъ этгенни эркинлиги беш жылгъа дери сыйырылыргъа боллукъду.