Таза суу бла тынгылы жалчытылынырча

Къабарты-Малкъарда «Жашау этерча  инфраструктура» миллет проектге кирген «Коммунал инфраструктураны жангыртыу» федерал программагъа  кёре,  2025-2027 жыллада ичер суу бла жалчытырыкъ  22 объект ишленирикди неда  жангыртыллыкъды.   Аладан 14-сю муниципалитетлеге жетеди, деп билдириледи КъМР-ни Къурулуш эмда жашау журт-коммунал мюлк министерствосуну пресс-службасындан.

Сагъынылгъан проектге кёре, быйыл  Чегем районда  да тийишли ишле башланнгандыла. Аны кезиуюнде 14 километр чакълы бирде таза суу баргъан ызланы жангыртырча мадар этилликди.

Бюгюнлюкде къурулуш организацияны келечилери   Чегем шахарны Ленин атлы эм Советская орамларында  алты километрден асламда суу баргъан ызланы къазып мурдорларын хазырлагъандыла.  Ол санда вентильле турлукъ  къуюланы да салып кюрешедиле. 

Аны бла бирге Экинчи  Чегемде да жангы микрорайонда да жангы скважина ишленирикди эм сегиз километрде быргъыла тартыладыла.

Керек материалла жетерча алыннгандыла, энчи техника эм ишчиле да бардыла.     

Сагъынылгъан амалланы хайыры бла  болгъан инфраструктура бузукълукъсуз уллу ауурлукъ бла  ишлерча боллукъду.  Аны бла бирге  иги кесек  арбазны  да таза суу бла тынгылы этерге болушурукъду.