Заманында тёлемегенледен къаты суралады

Быйыл жыл башланнганлы организацияла хайырланылгъан электрокюч ючюн «Россети Северный Кавказ» - «Каббалкэнерго» биригиуле  1,2 миллиард сом чакълы тёлегендиле эм борчларыны 81,9 процентин жапхандыла.    Ол былтыр бу заман бла тенглешдиргенде, 175 миллион сомгъа кёпдю. 

 Саулай алып айтханда, бюгюнлюкде сагъынылгъан къауумну энтта да  4,4 миллиард сом берликлери барды. Аны иги кесеги неда 4 миллиард сом  жашау журт-коммунал мюлк предприятиялагъа жетеди. 

Андан сора да,  «Каббалкэнерго» биригиуде  жыл башланнганлы  тёлемей борч этип тургъанланы  тинтирча эсепле чыгъаргъандыла.  Анга кёре, къышны эки айында окъуна сюдлеге 244,6 миллион сом багъасына 108 иск берилгенди.  Алай бла, алгъаракъда ачылгъан ишлени да эсге алсакъ, 146 миллион сом багъасына 113 иск къабыл этилгенди.

Эсге сала айтсакъ, кёп заманны тёлемей, борч этип тургъанла игилик бла ангыламасала, аланы закон бла жууапха тартырча онг барды. Аллай амаллагъа: ишлерин сюдге бериу, токну хайырланалмазча чек салыу да киреди. Сёз ючюн,  эки айдан аслам тёлемеген абонент  ток ыздан кесилирге боллукъду.  Аллай адам  ток бла жалчытылыныр ючюн борчун толусунлай жабаргъа тюшерикди. Ол санда ток чыбыкъны кесгенлерине эм къошханларына да кеси тёлерикди. Аны ёлчеми  объектни къыйынлыгъына кёре  болады. Анга кёре,  энчи арбазны иеси 3 минг, организацияны таматасы уа  10 минг сом берликди. Уголовный жууапха тартылгъанла уа РФ-ни Уголовный кодексини 165 -чи статьясына тийишлиликде эки жылгъа тутулургъа боллукъдула. 

 Токну багъасын компанияны https://gp-lc.rossetisk.ru/ сайтында «Энчи кабинетде», «Свет онлайн» приложенияда, адамланы жумушларына къарагъан аралада тёлерге жарайды.Ол санда  «Свет онлайн» приложенияны иги кесек адам хайырланады. Сервисни  GooglePlay - https://play.google.com/ эм AppStore - https://apps.apple.com/ сайтладан алып этерге онг барды. Аны себеплиги бла комиссиясыз тёлерге, эсеплеген приборда ненча ойнагъанын жиберирге, къайсы айда къаллай бир берилгенине квитанция бла шагъырейленирге болады. Быллай амал энергокюч компания бла абонентни арасында байламлыкъны бютюн бек кючлегенин да белгилерчады.

«Россети Северный Кавказ»-«Каббалкэнерго» биригиуню келечилери токну къаллай бир ойнагъанын айны 23-26 кюнлеринден кеч къалмай жиберирге эм тёлеулени уа онусуна дери этерге кереклерин эсге саладыла.