Хыйлачыла газгъа къарагъан сылтау бла келирге боллукъдула

«Газпром газораспределение Нальчик» компаниядан билдиргенлерине кёре, фатарда неда юйде орнатылгъан газ оборудованиягъа план бла къарау жумушну тындырыргъа келген инсанла хыйлачыла болургъа боллукъдула. Алагъа алданмаз ючюн аланы керти специалистден айыра билирге керекди.

Биринчиден, юс кийимлерине къарагъыз. Компанияны келечилери «Газпром межрегионгаз Нальчик» неда «Газпром газораспределение Нальчик» жазыулары болгъан энчи кийимле киедиле. Алары жокъмуду? Сагъайыгъыз!

Экинчиден, келген адамны къолунда удостоверениясы болургъа керекди. Сиз аны сорсагъыз, керти специалист аны кёргюзтюрге бир заманда да угъай дерик тюйюлдю. Анда уа аны сураты, организацияны мухуру, официальный белгиси болургъа тийишлиди. Аны къолугъузгъа алып, неси бар эсе да,  ашыкъмай,  иги къарагъыз.

Ючюнчюден а, ол адам этген ишлерини юсюнден акт берирге борчлуду: къайсы тюрлю да тинтиу, оборудованияны алышыу неда анга ремонт жумушла официальный халда жарашдырыладыла. Актда ол адам кеси къол салып, организацияны мухурун да салыргъа керекди. Быллай адам сизге бир тюрлю къагъыт бермей кетген эсе уа ол, баям, хыйлачы болур эди.

Ишекли бола эсегиз – сёлешип билигиз! Ушакъ этиуню къоюп, газ компанияны 8-800-100-09-04 номерине сёлешигиз. Анда сизни юйде тинтиу бардырыла эсе билдирликдиле, кимни жибергенлерин да айтырыкъдыла.

Бу жорукъланы эсде тутугъуз!

- Газ компанияны адамлары «хакъсыз тинтейик», «мычымай алышайыкъ» деген сылтаула бла кеслери бир заманда да сёлешмейдиле.

- СМС бла келген кодланы, парольланы, паспортдан информацияны эмда лицевой счётну бир кишиге да айтмагъыз. Бютюнда сиз танымагъан номерден сёлешип сорсала.

- Болсада сёлешип, абери берирге неда бир зат бла жалчытыргъа сюебиз дей эселе, телефонну салып, квитанцияда неда компанияны сайтында жазылгъан номерледен бири бла кесигиз сёлешип, ишни болушун соругъуз.

Мында жазылгъан некди магъаналы?

Хыйлачыла ахчагъызны урламагъанлыкъгъа, хата салыргъа уа боллукъдула. Нек дегенде, газ оборудованиягъа тапсыз ремонт этиу неда жарты-къурту тинтиу игиге келтирмезге боллукъду. Ол а къуру бохчагъызгъа угъай, жашауугъузгъа да къоркъуулуду.