Алтын излеуню жангыдан бардырлыкъдыла

Тырныауузда алтынны къазып эм магъаданны  жарашдырып башлауну проектине 50 миллиард сом къоратыллыкъды, деп билдиргендиле республиканы Башчысыны администрациясында.

«Къабарты-Малкъарда алтынны бла вольфрам-молибден магъаданны чыгъарып жарашдырыуну проектлери жашауда бардырыладыла. Магъаданны къазып, жарашдырыу жаны бла ишле башланнгандыла, аллай жерлени арендагъа берирча келишимле хазыр этилгендиле, бюгюнлюкде геология-тинтиу ишле бардырыладыла. Жылны аягъына ол жумушла ахырына жетдирилселе, проектни финанс-экономика модели жарашдырыллыкъды. Аны багъасы 50 миллиард сом чакълы боллукъду», - деп билдиргендиле Башчыны администрациясындан.

Бюгюнлюкде алтын къазыллыкъ жерге жолну ишлеп бошагъандыла, анга 4 миллиард 100 миллион сом  къоранчла этилгендиле. Проектге кёре, алтынны шахта ишлемей, ачыкх амал бла къазарыкъдыла, сора  алтыны болгъан магъаданны байыкъландырып, жарашдырлыкъдыла.

Вольфрамы бла молибдени болгъан магъаданны Тырныауузну Тау-байыкъландырыучу комбинатында жарашдырып, концентратны Ставрополь крайда Невинномысск шахарны гидрометаллургия заводуна ташырыкъдыла.