Туризмни айнытыр ючюн – битеулю мадарла

«Единая Россия» политика партияны  халкъ программасын беш жылны ичинде толтурууну эсеплерине жораланып, «Жетишим барды» деген форум къуралгъанды.

Анда «экономика» майданда жангыртылгъан программаны, республиканы айныуун, ол санда къонакъбайлыкъ жаны бла да онгларын тинтгендиле. Анга курортла эм туризм министр Аскер Бифов, предпринимательле, бу ишге сейирлери болгъанла да къатышхандыла.

Жыйылыуда энчи магъана республиканы солугъанланы санын кёбейтиуге, къонакъбайлыкъ онгланы игилендирирге, бютюнда уа санатор-курорт багъыуда, «Эльбрус» бла Нальчикде солуу жерлени айнытыугъа ахча келирча этерге кереклиси айтылгъанды. Бизнесге тынчлыкълы онгла къуралыргъа, аны «ауанадан» чыгъарып, официал халда ишлерге кёллендирирге кереклиси, жангы жолоучулукъланы къурау да хайыр келтирлиги энчи белгиленнгенди. Билимли ишчилени хазырлар ючюн а билим берген учрежденияла бла байламлыкъла жюрютюрге тийишлиси да сагъынылгъанды.