Айырмалы къауум ачыкъланнганды

Бу кюнледе Нальчикде «Автомобиль транспорт бла байламлы къыйын болумлада къутхарыу ишлени бардырыуда алчы къауум» деген тёрели битеуроссей конкурсну регион кезиую ётгенди.

Быйыл анга РФ-ни МЧС-ини КъМР-де Баш управлениясыны от ёчюлтюу-къутхарыу бёлюмюню, Элбрус излеу-къутхарыу отрядны эм КъМР-ни от тюшюуге къажау  службасыны келечилери къатышхандыла – саулайда 28 команда.

Жыл сайын кеслерини усталыкъларын ачыкъларгъа сюйгенлени саны ёсе барады. Аланы хар биринде да,  жол-транспорт аварияланы кезиулеринде къутхарыу ишлени тамамларгъа аттестацияны ётюп,  эркинликлери болгъан тёртюшер къутхарыучу бар эдиле.

Конкурсха къатышханланы алларында, тийишли техниканы бла амалланы хайырлана, аварияны кезиуюнде къыйын болумгъа тюшгенлени къысха заманны ичинде къутхарыу, жаннган автотранспортну ёчюлтюу, жаралыгъа биринчи медицина болушлукъ тапдырыу эм аны къоркъуусуз жерге кёчюрюу дегенча борчла салына эдиле.

– Харкюнлюк болумлада ол жумушланы тюз тамамлай билиуню магъанасы бек уллуду. Нек дегенде къыйын чып тюшген адамгъа тийишлисича болушлукъ этилмесе, ол ёлюрге да боллукъду, -деп чертгенди РФ-ни МЧС-ини КъМР-де Баш управлениясыны таматасыны орунбасары Анзор Кагазежев.

Аны себепли эришиуню сюзгенле ол затлагъа энчи эс бёлгендиле.

Алай бла, эсеплеге кёре, биринчиле Уллу от тюшюулени ёчюлтюу жаны бла энчи  бёлюмню келечилери болгъандыла. Экинчи жерге Элбрус излеу-къутхарыу бёлюмню къаууму чыкъгъанды. Ючюнчю жерде уа ПСЧ-17 бёлюмню командасы орналгъанды.

Энди бардырыллыкъ регионла аралы эришиулеге биринчи  жерни алгъан къауум къатышырыкъды.