Медицина бёлюмге борчла белгиленнгендиле

Кёп болмай Тырныауузда Къулийланы Къайсын атлы Маданият юйде Элбрус районну медицина бёлюмюню кенгеши болгъанды. Анда тамамланнган жумушланы эсеплегендиле эм этилирге кереклерин да белгилегендиле. Жыйылыугъа КъМР-ни саулукъ сакълау министрини орунбасары Татьяна Аникушина, районну администрациясыны башчысы Отарланы Мухтар, ара район больницаны баш врачы Тилланы Хабибуллах, депутатла, эллени таматалары, медицина ишчиле эм башхала къатышхандыла. 

Жыйылыуну ача, Тилланы Хабибуллах былтыр районла аралы больницаны бла поликлиниканы ишлерини юслеринден толу хапар билдиргенди. Ол санда эсепле бла шагъырейлендиргенди эм быйылгъа  салыннган борчланы да ачыкълагъанды.  

Айтылгъаныча, былтыр  диспансеризация тири ётгенди, мюлк-техника мурдорну да иги кесегин жангыртыргъа онг табылгъанды эм медицина болушлукъ да тынгылы берилирча мадар этилгенди. 

Келир заманны юсюнден айтханда, быйыл кадрла бла тынгылы жалчытыргъа эм багъыуда да жангы амалланы хайырланыргъа мурат этиледи. 
Тюбешиуде стоматология поликлиниканы баш врачы Ногъайлыланы Мустафа да сёлешгенди. Ол бюгюнлюкде узакъ элледе жашагъанлагъа да тийишли болушлукъ тапдырылгъанын билдиргенди. 

Кенгешни ахырында ведомствону эм районну келечилери медицина учрежденияланы ишлерине ыразы болгъанларын билдиргендиле.