Сюймеген ишингден къутулургъа къоркъургъа керек тюйюлдю

31 мартда дуния Сюймеген ишингден къутулгъанны кюнюн белгилейди. Ол да бошдан тохташдырылгъан болмаз: иши адам улуну жашаууну эм магъаналы кесеклеринден бириди десек, жангылыч болмаз. Сюйген иши уа къууанч, ырахатлыкъ, зауукълукъ келтиреди, уллу жетишимлеге кёллендиреди, махтаугъа келтиреди. Анга шагъатлыкъ этген шартла бек кёпдюле. Урунууну Жигити деген махтаулу атха тийишли болгъанланы ишчи жолларына къарасакъ, асламысы ишлерин сюйгендиле, анга жашауларыны ахырына дери кертичи болгъандыла, анга билимлерин, кюч-къарыуларын да аямай берилгендиле.

Айхай да, жаш адамла усаталыкъ сайлагъан заманларында, ол алагъа тамам келиширигине бла къаллыгъына, ёмюрюн аны бла байламлы эталлыгъына бла эталмазлыгъына толусунлай тюшюналмайдыла. Артда тынчлыгъына неда иш хакъына алданып, сюймеген   ишин бардырады, андан толу зауукълукъ алалмай, аны тийишлисича да толтуралмай.

Бирде уа адам жюреги тартхан ишинде урунургъа сюйгенликге, жашау болумла аны башха жанына буруп къояды: кёбюсюнде хакъына келишалмай,  аны алышыргъа тюшеди. Ол а бара-баргъан заманда адамны ич дуниясын тозуратыр халгъа келтиреди, ол жюрек ырахатлыкъ табалмайды.

Бир-бирле уа, тюрлениуден къоркъуп, сюймеген ишлеринде кёп заманны кечинип турадыла: кесин, башхаланы да ауурландырып, къыйнап. Жаратмагъан ишинги къояргъа къоркъмасанг, минг тюрлю башха онгла  ачыладыла. Айхай да, сюймеген ишингден къутулуу жигерликни излейди.  Бу болумда биринчи атлам — кесинги таныуду. Адам кесин иги жанындан ачаргъа, билирге, муратларына жол ачаргъа тийишлиди. Итиниулюк жашауну кенг жолуна чыгъарыргъа болады.  Адам дунияда бир кере жашайды, анга кёре иши анга, кертиси бла да, къууанч бла ырахатлыкъ келтирирге керекди, деп мени оюмум алайды, сизни уа?