Миллет тепсеуле, жубанчлы оюнла, сейир кёрмюч

Бу кюнледе Нальчик шахарда КъМР-ни Жаш тёлюню ишлери жаны бла министерствосуну мекямында Малкъар халкъны жангырыууну кюнюне жораланнган жыйылыу болгъанды.

Ары келгенлеге халкъны къол усталарыны ишлерини кёрмючю къуралгъанды. Анда Жолабланы Мунираны агъачдан тёрели оюула салыннган аберилерин, Бачиланы Асиятны миллет оюулары бла кийимлерин, Нёгерланы Асланны таулу бичакъларын, Бегийланы Заурну териден затларын кёрюрге боллукъ эди. Ала, тёреде болгъан къол усталыкъны бюгюннгю кюннге келишдире, тюрлендире, ишлерин бийик даражада этерге кюрешгендиле - халкъгъа жууукълашдыра.

Жыйылыугъа къатышханланы КъМР-ни жаш тёлюню ишлери жаны бла министрни орунбасары Ахметланы Артур алгъышлагъанды. «Бюгюн ингирде сизге деп, таулу той бардырабыз. Келигиз, ариу адетлерибизни кёргюзтейик», - дегенди.

Ингирни бардыргъан Атмырзаланы Аминат келген жаш тёлюге халкъыбызны эрттеден жюрютюлген адетине кёре, жашланы - онг жанына, къызланы сол жанына сюеген эди. Ол да бошдан тюйюл эди: андан ары хар къобуз тартыугъа, жыргъа,  аланы бир къауумлары чыгъып, тойну ёчюлтмей, тепсеуню ахырына дери бардырып тургъан эдиле.

Адетлерибиз унутула баргъанлары ючюн жаш тёлюбюз асламысында аланы жашырынлыкъларын билмейдиле. Ол себепден аланы бу ингирде кёргюзтюлгенлери кёплеге дерс эди.

Жырчыладан Заммайланы Лейля, Хочуланы Екатерина, Ботталаны Алий бла Нурлан Джамалдинов,  сахнагъа чыгъып, жарыкъ жырлары бла келгенлени кёллерин кётюргендиле. Анга уа къараучуланы толкъун къарслары шагъатлыкъ этгендиле.

Андан ары Апполаны Альберт бла Шауаланы Артур халкъ тартыула бла жыйылгъанланы къууандыргъандыла. Аланы жарыкъ макъамларына жаш тёлю чыгъып тепсегенди.

Сахнагъа чыкъгъанланы хар бири да фахмулары бла концертни ариу халда ётдюрюрге себеп   этгендиле.

Ингир бара тургъанында, жырчыла, жырлагъанлары бла къалмай, ариу алгъышла да айтхандыла, бу жумушну къурагъанлагъа да ыспас этгендиле.

Бери жыйылгъан жаш тёлюге дагъыда бир дерс: жубанч: «Шинтик оюн» бла «Жюзюк оюн» къуралгъанды. Алагъа къатышыргъа сюйгенле бек кёп болдула. «Шинтик оюн» керти окъуна жубанч халда ётдю. «Жюзюк оюннга» къатышханлагъа уа саугъала берилгендиле.

Къысхасы, чамгъа, лакъырдагъа, оюннга, кюлкюге да бар эди мында жер.

Быллай жыйылыула халкъыбызны ахшы тёрелерин жангыдан жашаугъа къайтарыргъа, жаш тёлюню ариу ызгъа салыргъа, адеп-къылыкъгъа юйретирге себеплик этедиле.