Мирзеулюкден - бай тирлик

Бюгюнлюкде мирзеу ёсдюрюу эл мюлкню къыйматлы бёлюмлеринден бирине саналады. Ол себепден сабанчыла дайым жангы жетишимлеге итиннгенлей турадыла.

Шимал Кавказны статистика управлениясындан билдиргенлерича,  былтыр Къабарты-Малкъарны мюлклеринде  мирзеулюкледен бла  эм къудору битимледен 1200 минг тонна жыйылгъанды. Ол буруннгу жылладан эсе 104,5 процентге кёпдю.

Тирликни асламысы неда 70 проценти эл мюлк организациялагъа, фермерлеге эм энчи  предпринимательлеге жетеди. Ала барысыда бирден 830 мингден аслам тирлик бергендиле.

Орта эсеп бла алып айтханда, мирзеу бла къудору битимледен   бир гектардан 57,1  центнер алыннганды. Ол  буруннгу жылдан 2,7 процентге кёпдю.  Шимал Кавказда эм къыралда орта кёрюмдюле бла тенглешдиргенде да, 30 эм 1,7 процент ёсюм эсленеди.

Озгъан жыл бай тирлик жыйылгъанына агротехника мадарланы заманында этилгенлери, иги урлукъ хайырланнганы, сугъарыу бардырылгъаны, семиртгичле салыннганлары да себеплик этгендиле. Аны бла бирге  арендаторла сабанлыкъладан эки кере тирлик алырча амалла да излейдиле. Анга кёре,  жыл сайын тирликге къошула барады.